ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារនេះថា សំណើសន្តិភាពចុងក្រោយរបស់ទីក្រុងតេអេរ៉ង់ចំពោះសហរដ្ឋអាមេរិកពាក់ព័ន្ធនឹងការបញ្ចប់អរិភាព នៅគ្រប់ទិសទី រួមទាំងប្រទេសលីបង់ ការដកកងកម្លាំងអាមេរិកចេញពីតំបន់ជិតអ៊ីរ៉ង់ និងសំណងសម្រាប់ការបំផ្លិចបំផ្លាញដែលបង្កឡើងដោយសង្គ្រាមអាមេរិក-អ៊ីស្រាអែល។

នៅក្នុងអត្ថាធិប្បាយដំបូងរបស់ទីក្រុងតេអេរ៉ង់អំពីសំណើនេះ អនុរដ្ឋមន្ត្រីការបរទេសលោក Kazem Gharibabadi បាននិយាយថាទីក្រុងនេះក៏បានស្វែងរកការដកទណ្ឌកម្ម ការដោះលែងមូលនិធិដែលបង្កក និងការបញ្ចប់ការបិទផ្លូវសមុទ្ររបស់សហរដ្ឋអាមេរិកលើប្រទេសនេះ។ នេះបើយោងតាមទីភ្នាក់ងារសារព័ត៌មាន IRNA។

លក្ខខណ្ឌដូចដែលបានពិពណ៌នានៅក្នុងរបាយការណ៍របស់អ៊ីរ៉ង់ ហាក់ដូចជាមានការផ្លាស់ប្តូរតិចតួចពីសំណើមុនរបស់អ៊ីរ៉ង់ ដែលប្រធានាធិបតីអាមេរិកលោក ដូណាល់ ត្រាំ (Donald Trump) បានបដិសេធកាលពីសប្តាហ៍មុនថា ជា «សំរាម»។

លោក ត្រាំ បាននិយាយកាលពីថ្ងៃចន្ទថា លោកបានផ្អាកការវាយប្រហារឡើងវិញដែលបានគ្រោងទុកលើអ៊ីរ៉ង់ បន្ទាប់ពីទីក្រុងតេអេរ៉ង់បានផ្ញើសំណើសន្តិភាពថ្មីទៅកាន់ទីក្រុងវ៉ាស៊ីនតោន ហើយថាឥឡូវនេះមាន «ឱកាសល្អណាស់» ក្នុងការឈានដល់កិច្ចព្រមព្រៀងមួយដែលកំណត់កម្មវិធីនុយក្លេអ៊ែររបស់អ៊ីរ៉ង់៕