យោងតាមប្រព័ន្ធផ្សព្វផ្សាយអ៊ីស្រាអែល បាន​ឲ្យ​ដឹង​ថា កងទ័ពអ៊ីស្រាអែលបានឃាត់ទុក​នាវាចំនួន​ជាង ៤០​គ្រឿង ពីក្នុង​ចំណោម​ ៥៤គ្រឿង ដែលចូលរួមក្នុងកងនាវាផ្ដល់​ជំនួយ Global Sumud Flotilla ដែលកំពុង​ធ្វើ​ដំណើរឆ្ពោះទៅកាន់តំបន់ហ្កាហ្សា នៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ​។

ហើយ​ដោយ​សំអាង​ដល់​ប្រភព ដែល​បាន​និយាយ​ក្នុង​លក្ខខណ្ឌមិន​បញ្ចេញ​ឈ្មោះ គេហទំព័រព័ត៌មានអ៊ីស្រាអែល Walla បានរាយការណ៍ថា កង​ទ័ព​បានឃុំ​ខ្លួនសកម្មជន​ប្រហែល ៣០០នាក់​​​។ សារព័ត៌មាន​ Walla បានបន្ថែមថា កងទ័ពជើងទឹកអ៊ីស្រាអែល មិនទាន់បានស្ទាក់ចាប់នាវាទាំងអស់នោះទេ ហើយទូកជាច្រើនគ្រឿង នៅតែស្ថិតនៅក្នុងសមុទ្របើកចំហ​។

កាលពីថ្ងៃចន្ទ កងទ័ពអ៊ីស្រាអែលបានបើកការវាយប្រហារលើកងនាវាដែលដឹកជំនួយមនុស្សធម៌ នៅក្នុងដែនទឹកអន្តរជាតិ ដែលជំរុញ​ឲ្យ​មានការថ្កោលទោសយ៉ាងទូលំទូលាយពីអន្តរជាតិ។

គួរបញ្ជាក់ថា ដោយមានការចូលរួមពីទូកចំនួន ៥៤គ្រឿង កងនាវាផ្ដល់​ជំនួយ​នេះ​បានចេញដំណើរ កាលពីថ្ងៃព្រហស្បតិ៍ពីតំបន់​ Marmaris របស់ប្រទេស​ទួរគី ដែល​ជា​ការប៉ុនប៉ងថ្មី ដើម្បីទម្លាយ​ការបិទដោយ​ខុសច្បាប់របស់អ៊ីស្រាអែល ដែលបានដាក់លើតំបន់ហ្កាហ្សា ចាប់តាំងពីឆ្នាំ២០០៧។

នេះមិនមែនជាឧប្បត្តិហេតុដំបូងដែលពាក់ព័ន្ធនឹងកងនាវាទាំង​នេះ​នោះទេ។ កាលពី​ចុងខែមេសា កងទ័ពអ៊ីស្រាអែលបានវាយប្រហារទូក​របស់​កងនាវាផ្ដល់​ជំនួយ​នេះ ក្នុងដែនទឹកអន្តរជាតិ នៅម្ដុំ​កោះ Crete របស់ប្រទេសក្រិក​។ ក្បួននាវា​នាពេលនោះ រួមមានអ្នកចូលរួមចំនួន ៣៤៥នាក់ មកពី ៣៩ប្រទេស៕