អធិការបតីអាល្លឺម៉ង់ លោក Friedrich Merz នៅ​ថ្ងៃអង្គារ (ទី​១៩ ខែឧសភា ឆ្នាំ២០២៦) នេះ​ បានជំរុញឲ្យ​ទីក្រុងតេអេរ៉ង់វិលត្រឡប់ទៅកាន់​តុ​ចរចាជាមួយសហរដ្ឋអាមេរិកវិញ ដោយព្រមានថា ជម្លោះអូសបន្លាយ នឹងមានផលវិបាកធ្ងន់ធ្ងរ នៅទូទាំងតំបន់នេះ​ និងផ្សេង​ទៀត​។

នៅ​ឯ​សន្និសីទសារព័ត៌មានរួមគ្នាជាមួយប្រធានាធិបតីស្វីស លោក​​ Guy Parmelin នៅទីក្រុងប៊ែរឡាំង លោក Merz បានប្រាប់ថា៖ «អ៊ីរ៉ង់ត្រូវតែទៅកាន់​តុចរចា។ ប្រទេស​នេះត្រូវតែឈប់លលេងនឹង​ពេលវេលាទៀត​ទៅ»។ លោក​បាន​សង្កត់ធ្ងន់​ថា «អ៊ីរ៉ង់មិនត្រូវយក​តំបន់ និងពិភពលោកទាំងមូលជាចំណាប់ខ្មាំងទៀតឡើយ​»។

ការកត់សម្គាល់របស់លោកបានកើតឡើង មួយថ្ងៃបន្ទាប់ពីប្រធានាធិបតីអាមេរិក លោក Donald Trump បានប្រកាសថា លោកបានសម្រេចចិត្តពន្យារពេលការវាយប្រហារយោធាដ៏ធំ​មួយ លើ​អ៊ីរ៉ង់ ដែលបានគ្រោងទុក នៅ​ថ្ងៃអង្គារនេះ​ បន្ទាប់ពីការអំពាវនាវដោយផ្ទាល់ពីបណ្ដាមេដឹកនាំនៃប្រទេសកាតា អារ៉ាប៊ីសាអ៊ូឌីត និងអេមីរ៉ាត​អារ៉ាប់រួម (UAE)។

តែ​លោក Trump បានបន្ថែមថា លោកបានណែនាំមន្ត្រីការពារជាតិ និងយោធាជាន់ខ្ពស់ឲ្យ​ «ត្រៀមខ្លួនជាស្រេច ដើម្បីបន្តការវាយប្រហារទ្រង់ទ្រាយធំទាំងស្រុងភ្លាមៗ លើអ៊ីរ៉ង់ ក្នុងករណីដែលកិច្ចព្រមព្រៀងអាចទទួលយកបាន មិនត្រូវបានឈានដល់ទេ​នោះ​»។

ជាមួយ​គ្នានេះ លោក​អធិការបតី​អាល្លឺម៉ង់ បានគូសបញ្ជាក់ថា ការបិទច្រកសមុទ្រ Hormuz ជាបន្តបន្ទាប់ កំពុងគំរាមកំហែងដល់សេដ្ឋកិច្ចពិភពលោក និងបង្កគ្រោះថ្នាក់យ៉ាងធ្ងន់ធ្ងរដល់ប្រទេសដែលផ្តោតលើការនាំចេញ ដូចជាអាល្លឺម៉ង់ និងស្វីសជាដើម​៕