នៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ សេវាស៊ើបការណ៍សម្ងាត់បរទេស​រុស្ស៊ី (SVR) បានអះអាងថា ប្រទេស​អ៊ុយក្រែនកំពុងរៀបចំការ​វាយ​ប្រហារ​រលកថ្មីដោយយានដ្រូន លើ​តំបន់​ជាច្រើន​របស់​រុស្ស៊ី ដោយ​ប្រើប្រាស់ទឹកដីរបស់​ឡាតវី ដើម្បីបើក​ប្រតិបត្តិការ​របស់ខ្លួន​។

យោងតាម ​​​​SVR បាន​ឲ្យ​ដឹង​ថា «របបរបស់លោក Volodymyr Zelenskyy ប្តេជ្ញាបង្ហាញដល់អ្នកឧបត្ថម្ភមនោគមវិជ្ជា និងហិរញ្ញវត្ថុរបស់ខ្លួននៅអឺរ៉ុបថា កងកម្លាំងប្រដាប់អាវុធអ៊ុយក្រែនរក្សាសក្តានុពលប្រយុទ្ធ និងសមត្ថភាព ក្នុងការបង្កការខូចខាតដល់សេដ្ឋកិច្ចរុស្ស៊ី»។

ទីភ្នាក់ងារនេះបានចោទប្រកាន់ថា កងកម្លាំងអ៊ុយក្រែនមានគម្រោង មិនត្រឹមតែប្រើប្រាស់ច្រករបៀងផ្លូវអាកាសដែលផ្តល់ដោយរដ្ឋនៃ​តំប់​បាល់ទិកពីមុន​ប៉ុណ្ណោះទេ ប៉ុន្តែថែមទាំងបាញ់បង្ហោះយានដ្រូន​ដោយផ្ទាល់ពីទឹកដីរបស់ប្រទេស​ទាំង​នេះ ដើម្បីចំណេញ​ពេលវេលាហោះហើរ និងបង្កើនប្រសិទ្ធភាពនៃការវាយប្រហារ។

ទីភ្នាក់ងារ​នេះ បានបន្ថែម​ថា «យោងតាមព័ត៌មានដែលទទួលបាន ទីក្រុងគីវមិនមានបំណងត្រឹម​តែ​ប្រើប្រាស់ច្រករបៀងផ្លូវអាកាសដែលប្រទេសបាល់ទិក បានផ្តល់ដល់កងកម្លាំងប្រដាប់អាវុធអ៊ុយក្រែន (AFU) ប៉ុណ្ណោះ​ទេ។ យាន​ដ្រូន​ក៏ត្រូវបានគ្រោងនឹងបាញ់បង្ហោះចេញពីទឹកដីនៃរដ្ឋទាំងនេះផងដែរ»។

ទីក្រុងមូស្គូក៏បានអះអាងផងដែរថា ប្រទេសឡាតវីបានយល់ព្រមគាំទ្រប្រតិបត្តិការនេះ ទោះបីជាមានក្ដី​បារម្ភ អំពីលទ្ធភាព​អាចមាន​ការសងសឹកក៏ដោយ។

សេចក្តីថ្លែងការណ៍នេះបានបញ្ជាក់​ថា បុគ្គលិកអ៊ុយក្រែនមកពីកងកម្លាំងប្រព័ន្ធ​យាន​ដ្រូន​របស់ប្រទេស ត្រូវបានដាក់ពង្រាយរួចហើយ ទៅកាន់មូលដ្ឋានយោធារបស់​ឡាតវី ដែល​រួម​មាននៅ​តំបន់​​ Adazi, Selia, Lielvarde, Daugavpils និង Jekabpils៕