លោកនាយករដ្ឋមន្ត្រី Ulf Kristersson បានប្រកាសនៅថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ថា ស៊ុយអែតនឹងទិញនាវាចម្បាំងថ្មីចំនួន ៤គ្រឿង ពីក្រុមហ៊ុនការពារជាតិបារាំង Naval Group ដែលជាការវិនិយោគយោធាដ៏ធំបំផុតមួយជាលើក​ដំបូងរបស់ប្រទេស​ ក្នុងរយៈពេលជាច្រើនទសវត្សរ៍។

យោងតាមប្រព័នញថផ្សព្វផ្សាយ​ស៊ុយអែត SVT បាន​ឲ្យ​ដឹង​ថា លោក Kristersson បានប្រាប់សន្និសីទសារព័ត៌មានថា នាវាទាំងនេះ គឺជានាវាដែល «បំពេញតម្រូវការស៊ុយអែតបានល្អបំផុត»។

នាវាចម្បាំងប្រភេទ FDI ថ្មីទាំងនោះ នឹងពង្រីកសមត្ថភាពការពារជាតិកងទ័ពជើងទឹក និងអាកាសរបស់ស៊ុយអែតយ៉ាងច្រើន ក្នុង​នោះ​រួមទាំងការការពារប្រឆាំងនឹងយន្តហោះចម្បាំង និងមីស៊ីលបាលីស្ទិក​។

លោក Kristersson បានបញ្ជាក់ថា វាគឺជា «ការវិនិយោគការពារជាតិដ៏ធំបំផុតមួយ» ចាប់តាំងពីយន្តហោះចម្បាំង Gripen ដែលជាយន្តហោះចម្បាំងពហុតួនាទីល្បឿនលឿនជាងសំឡេងម៉ាស៊ីនតែមួយទម្ងន់ស្រាល ត្រូវបានណែនាំនៅក្នុងទសវត្សរ៍ឆ្នាំ១៩៨០ ដោយបន្ថែមថា ការទិញនេះនឹងបង្កើនសមត្ថភាពប្រឆាំងយន្តហោះរបស់ប្រទេសស៊ុយអែតបាន​ ៣ដង បើប្រៀបធៀបទៅនឹងកម្រិតបច្ចុប្បន្ន។ លោកបានបន្ថែមថា៖ «ជាមួយនឹងការសម្រេចចិត្តនេះ ខ្ញុំជឿជាក់ថា ប្រទេសស៊ុយអែតឥឡូវនេះ កំពុងរួមចំណែកដល់ការធ្វើឲ្យ​សមុទ្របាល់ទិកមានសុវត្ថិភាពខ្លាំង​ជាងមុន នាពេលអនាគត»។

ចំណែក​អគ្គមេបញ្ជាការ លោក Michael Claesson បាននិយាយថា នាវាទាំងនេះក៏នឹងអាច​ឲ្យ​ប្រទេសស៊ុយអែតចូលរួមកាន់តែមានប្រសិទ្ធភាព ក្នុងប្រតិបត្តិការនាពេលអនាគតរបស់​អង្គការណាតូ (NATO) លើសពីតំបន់បាល់ទិក។

ប្រព័ន្ធផ្សព្វផ្សាយ SVT បាន​ឲ្យ​ដឹង​បន្ថែម​ថា ការចរចា រវាងអាជ្ញាធរស៊ុយអែត និងបារាំង ត្រូវបានគេរំពឹងថា នឹងចាប់ផ្តើមក្នុងពេលឆាប់ៗនេះ។ ការដឹកជញ្ជូន ត្រូវបានគ្រោងនឹងចាប់ផ្តើមនៅឆ្នាំ២០៣០​ ក្នុងល្បឿន ១ឆ្នាំ ១គ្រឿង​។ តម្លៃប៉ាន់ស្មាន គឺប្រហែល ១០​ពាន់លានក្រូណាស៊ុយអែត (ជាង ១ពាន់លានដុល្លារ) ក្នុងនាវា ១គ្រឿង​៕