នាថ្ងៃអង្គារ (ទី១៩ ខែឧសភា ឆ្នាំ២០២៦) នេះ​ អេស្តូនី បានឲ្យ​ដឹង​ថា យន្តហោះយោធា ១គ្រឿងរបស់​អង្គការ​ណាតូ (NATO) បានបាញ់ទម្លាក់យាន​ដ្រូន​ដែល​សង្ស័យ​ថា ជារបស់​អ៊ុយក្រែន នៅ​លើ​ដែន​ដី​របស់​ប្រទេស​បាល់​ទិក​មួយ​នេះ​ ដោយ​នេះ​គឺ​ជាការរំលោភដែនអាកាសជាបន្តបន្ទាប់ចុងក្រោយបំផុត នៅក្នុងតំបន់នេះ ក្នុង​អំឡុង​ពេលមានការវាយប្រហារជាញឹកញាប់របស់អ៊ុយក្រែន លើរុស្ស៊ី។

ប្រទេសជិត​ខាង​ឡាតវី ក៏បានចេញការ​ព្រមាន​​​ អំពីយាន​ដ្រូន​ផង​ដែរ ដោយប្រាប់ប្រជាជននៅជិតព្រំដែនរុស្ស៊ីឲ្យ​ស្នាក់នៅក្នុងផ្ទះ ដោយយន្តហោះនគរបាល​អាកាសតំបន់​បាល់ទិករបស់​អង្គការ​ណាតូ ត្រូវបានបញ្ចូន​ទៅកាន់តំបន់នោះ។ នេះ​បើ​តាម​ការ​ឲ្យ​ដឹង​ពី​កងទ័ពឡាតវី។

គួរបញ្ជាក់​ថា អ៊ុយក្រែនបានបង្កើនការវាយប្រហារដោយយានដ្រូន​រយៈចម្ងាយឆ្ងាយលើរុស្ស៊ី ក្នុង​នោះ​រួមទាំងនៅជុំវិញតំបន់​បាល់ទិកផងដែរ។

ចាប់តាំងពីខែមីនាមក យានដ្រូន​យោធាអ៊ុយក្រែនជាច្រើនគ្រឿង បានហោះ​ខុស​គោល​ដៅ​ចូលទៅក្នុងដែនអាកាសរបស់ប្រទេស​សមាជិករបស់អង្គការ​ណាតូ គឺហ្វាំងឡង់ ឡាតវី លីទុយអានី និងអេស្តូនី ដែលសុទ្ធតែជាប់ព្រំដែនជាមួយរុស្ស៊ី។ រដ្ឋាភិបាលឡាតវីកាលពីសប្តាហ៍មុនបានលាលែងពីតំណែងដោយសារតែការដោះស្រាយការលុក​លុយ​របស់យាន​ដ្រូន​នេះ​។

រដ្ឋមន្ត្រីក្រសួងការពារជាតិអេស្តូនី លោក Hanno Pevkur បាននិយាយថា យាន​ដ្រូន​សង្ស័យ​របស់​អ៊ុយក្រែន បានត្រូវបានបាញ់ទម្លាក់នៅ​ថ្ងៃអង្គារនេះ ដោយយន្តហោះចម្បាំង F-16 របស់កងទ័ពអាកាសរ៉ូម៉ានី។ អង្គការ​ណាតូមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។

ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីសប្តាហ៍មុនថា អ៊ុយក្រែននឹងបញ្ជូនអ្នកជំនាញទៅឡាតវី ដើម្បីជួយការពារដែន​អាកាស​របស់ប្រទេសនេះ​៕