យោធាអ៊ីស្រាអែល នៅ​ថ្ងៃអង្គារ (ទី១៩ ខែឧសភា ឆ្នាំ២០២៦) នេះ បានព្រមានប្រជាជននៃទីក្រុង និងភូមិចំនួន ១២ នៅភាគខាងត្បូងនៃ​ប្រទេសលីបង់ ឲ្យ​ជម្លៀសចេញជាបន្ទាន់ មុនពេលអាច​មាន​ការវាយប្រហារ ប្រឆាំងនឹងក្រុមហេសបូឡា ដែលជាបទ​បញ្ជាចុងក្រោយបង្អស់ ទោះបីជាមានបទឈប់បាញ់ក៏ដោយ​។

អ្នកនាំពាក្យយោធាភាសាអារ៉ាប់ លោក Avichay Adraee បានបង្ហោះនៅលើបណ្ដាញ​សង្គម​ X ថា៖ «ការបន្តរំលោភបំពានបទឈប់បាញ់របស់ក្រុមហេសបូឡា ជំរុញ​ឲ្យ​ IDF (កងកម្លាំង​ការពារជាតិ​អ៊ីស្រាអែល) មាន​ប្រតិបត្តិការប្រឆាំងនឹងក្រុម​នេះ​។ IDF មិនមានបំណងធ្វើបាបអ្នកទេ។ ដើម្បីសុវត្ថិភាពរបស់អ្នក យើងសូមអំពាវនាវឲ្យ​អ្នកនៅឲ្យ​ឆ្ងាយពីតំបន់នោះ ហើយធ្វើ​ដំណើរ​ឲ្យ​បាន​ចម្ងាយ​យ៉ាងហោចណាស់ ១.០០០ម៉ែត្រភ្លាមៗ»។

ចំណែកទីភ្នាក់ងារសារព័ត៌មានជាតិដែលគ្រប់គ្រងដោយរដ្ឋលីបង់ បានរាយការណ៍ពីការវាយប្រហារជាបន្តបន្ទាប់របស់អ៊ីស្រាអែលដែលផ្តោតលើទីតាំងជាច្រើននៅភាគខាងត្បូងនៃ​ប្រទេសលីបង់ នៅ​ថ្ងៃអង្គារ។

ទន្ទឹមនឹងនេះ ក្រុមហេសបូឡាបានឲ្យ​ដឹង​នៅក្នុងសេចក្តីថ្លែងការណ៍មួយថា ខ្លួនបានកំណត់គោលដៅការប្រមូលផ្តុំទាហាន និងយានយន្តនៅភាគខាងជើងអ៊ីស្រាអែល ដោយ​ «ការ​វាយ​ប្រហារ​ដោយ​ហ្វូង​យានដ្រូន​»។ ក្រុមសកម្មប្រយុទ្ធដគាំទ្រដោយអ៊ីរ៉ង់មួយ​នេះ ក៏បានអះអាងពីការទទួលខុសត្រូវ ចំពោះការវាយប្រហារថ្មីប្រឆាំងនឹងកងកម្លាំងអ៊ីស្រាអែលដែលកំពុងប្រតិបត្តិការ នៅក្នុងទឹកដីលីបង់ផងដែរ។

គួរបញ្ជាក់ថា ចាប់តាំងពីការចាប់ផ្តើមមាន​បទឈប់បាញ់ កាលពី​ថ្ងៃទី១៧ ខែមេសាមក អ៊ីស្រាអែល បានបន្ត​វាយប្រហារ អនុវត្តការកម្ទេចចោល និងចេញបញ្ជាជម្លៀស នៅភាគខាងត្បូងលីបង់ ដោយផ្ដល់​ហេតុ​ផល​ថា ខ្លួនកំពុងកំណត់គោលដៅលើក្រុមប្រដាប់អាវុធដែលគាំទ្រដោយអ៊ីរ៉ង់។ ក្រុមហេសបូឡា ក៏បានបន្តប្រតិបត្តិការប្រឆាំងនឹងកងកម្លាំងអ៊ីស្រាអែល នៅភាគខាងត្បូងលីបង់ និងភាគខាងជើងអ៊ីស្រាអែលផងដែរ​៕