ភ្នំពេញ៖ អ្នកជំនាញទេសចរណ៍ ថ្លែងថា ការមានកំណើនភ្ញៀវទេសចរនេះ គឺបានធ្វើឲ្យបណ្តាអាជីវកម្មទេសចរណ៍ទទួលបានភាពកាក់កបច្រើនឡើងវិញ ខណៈអាជីវកម្មទាំងនោះ រងការប៉ះពាលខ្លាំងជាង ២ឆ្នាំកន្លងមកនេះ។

បើតាម លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីភិច ប្រចាំនៅកម្ពុជា ថ្លែងប្រាប់BTV នៅថ្ងៃទី១៨ ខែមេសានេះថា នៅក្នុងអំឡុងថ្ងៃបុណ្យចូលឆ្នាំថ្មីប្រពៃណីជាតិខ្មែរ ឆ្នាំខាលនេះ គ្រប់អាជីវកម្មក្នុងវិស័យទេសចរណ៍ទាំងអស់គឺមានកម្រើកខ្លាំងឡើងវិញ និង​សុទ្ធតែ​ទទួលភ្ញៀវជាតិអន្តរជាតិ ​ចូលទទួលសេវាកម្មស្ទើរពេញៗ ហើយអាជីវកម្មទេសចរណ៍​ដែល​ទទួល​បានភាពកាក់កបរកចំណូលបានច្រើនជាងគេ​ គឺអាជីវកម្មសណ្ឋាគារ ផ្ទះសំណាក់ ​ភោជនីយដ្ឋាន រមណីយដ្ឋានទេសចរណ៍​ សេវាដឹកជញ្ជូនភ្ញៀវ និងមុខរបរលក់ដូរចំណីអាហាររបស់ប្រជាពលរដ្ឋ។ ដោយឡែកអាជីវកម្មការីទេសចរណ៍ក៏មានការកម្រើកដែរ តែមិនសូវមានភ្ញៀវច្រើននោះទេ។

លោក ធួន ស៊ីណាន បន្តថា សម្រាប់ទេសចរមកពីក្រៅប្រទេសវិញ ​សំគាល់ឃើញថា ក៏មាន​ភ្ញៀវអន្តរជាតិមកទស្សនាកម្ពុជាច្រើនដែរ ​ប៉ុន្តែភាគច្រើនជាភ្ញៀវមានស្រាប់នៅក្នុងតំបន់អាស៊ាន ហើយការដើរកម្សាន្តរបស់គេភាគច្រើន ​មិនសូវមកទស្សនាកម្ពុជា​តាម​កញ្ចប់​ទេសចរណ៍នោះទេ ដោយ​សារគេចង់ដើរលេងកម្សាន្តសប្បាយជាមួយពលរដ្ឋខ្មែរ​ ក្នុងអំឡុងថ្ងៃបុណ្យចូលឆ្នាំនោះដែរ។

សូមបញ្ជាក់ថា អំឡុងពេលចូលឆ្នាំខ្មែរ ឆ្នាំ២០២២នេះ ​បណ្តាភោជនីយដ្ឋាន ​និងអាហារដ្ឋាន ក៏មាន​ភ្ញៀវចូលស្ទើរពេញៗ​ឡើងវិញ​ក្នុងរយៈពេល៣ថ្ងៃ ​ចំពោះការចំណាយរបស់​ប្រជាពលរដ្ឋ​ម្នាក់ៗ​ក្នុង​ពេលចូលឆ្នាំ៣ថ្ងៃ ​ឯកឧត្តមរដ្ឋមន្ត្រីក្រសួងទេសចរណ៍​បានទទួលការរាយការណ៍បឋមថា គ្រួសារ​មួយដែលមានគ្នា៥នាក់ ធ្វើដំណើរកម្សាន្តឆ្ងាយពីផ្ទះក្នុងពេល៣ថ្ងៃនេះ ពួកគាត់​បាន​ចំណាយ​មិន​តិច​ជាង ៥០០ដុល្លារដោយបានចាយទៅលើការស្នាក់នៅ​ ហូបចុក ធ្វើដំណើរ​ ចាក់សាំង រួម​ទាំង​ការ​ទិញទំនិញផ្សេងៗ​រៀបចំ​រណ្តាប់​បង្សុកូល​ និង​ចង្ហាន់​ទៅ​វត្តផងដែរ៕ អត្ថបទ ស៊ុម សុខជា