ការវាយប្រហារដោយយាន​ដ្រូន នៅ​ថ្ងៃអង្គារ (ទី​១៩ ខែឧសភា ឆ្នាំ២០២៦) នេះ បានសម្លាប់មនុស្សយ៉ាងតិច ២៨នាក់ និងបណ្ដាល​ឲ្យ​ ២៣នាក់ផ្សេងទៀតរង​របួស​ នៅពេលដែលបានវាយប្រហារលើ​ផ្សារមួយ​កន្លែង នៅ​ប្រទេសស៊ូដង់។ នេះបើយោងតាមប្រភពពី​ផ្នែកសុខាភិបាល និងសាក្សីចំនួន​ ៣រូប ដែល​បាននិយាយ​ប្រាប់សារព័ត៌មាន​ AFP។

តំបន់​ផ្សារ​នោះ ស្ថិត​នៅក្នុងទីក្រុងដែលគ្រប់គ្រងដោយកង​កម្លាំង​ប៉ារ៉ា គឺ Ghubaysh នៅក្នុង​ខេត្ត​​ West Kordofan។

សាក្សី ២នាក់បានប្រាប់​ឲ្យ​ដឹងថា យានដ្រូន​បានវាយប្រហារចំ​ភោជនីយដ្ឋានមួយ ដែលមានមនុស្សច្រើនកកកុញ នៅតំបន់​ផ្សារដ៏​សំខាន់របស់ទីក្រុង ដោយសន្មតថា ការវាយប្រហារនេះ​ត្រូវ​បាន​ធ្វើឡើង​ដោយ​កងទ័ពស៊ូដង់ ដែលបានជាប់​នៅក្នុង​សង្គ្រាមជាមួយកងកម្លាំងគាំទ្ររហ័ស (RSF) របស់យោធាប៉ារ៉ា ចាប់តាំងពីខែមេសា ឆ្នាំ២០២៣ មក​។

ចំណែក​សាក្សីម្នាក់ទៀត បានបញ្ជាក់​ថា វាបានវាយប្រហារដំបូង លើ​រថយន្តរបស់​ក្រុម​ RSF «បានសម្លាប់មនុស្ស ៣នាក់ដែល​ជិះ​នៅក្នុង​នោះ​ និងបំផ្លាញរថយន្តនោះ​តែម្ដង​ មុនពេលយាន​ដ្រូន​វាយប្រហារភោជនីយដ្ឋាន»។ ប្រភពពី​ផ្នែកសុខាភិបាល​បានប្រាប់​ថា ជនរងគ្រោះត្រូវបានបញ្ជូនទៅមន្ទីរពេទ្យ នៅទីក្រុង​ Ghubaysh៕