អង្គការសុខភាពពិភពលោក WHO ​កាលពី​ថ្ងៃអង្គារ ​​១៩ ខែឧសភា ​​សប្ដាហ៍​នេះ​​​​ បានសម្តែងការព្រួយបារម្ភអំពី «ទំហំ និងល្បឿន» នៃការផ្ទុះឡើងជំងឺអេបូឡា ដែលបានសម្លាប់មនុស្សជាង ១៣០នាក់នៅសាធារណរដ្ឋប្រជាធិបតេយ្យកុងហ្គោ ហើយបានព្រមានថាការឆ្លង​​​រាលដាល​​នេះ​​អាចនឹងអូសបន្លាយពេលយូរ។

ទីភ្នាក់ងារសុខភាពរបស់អង្គការសហប្រជាជាតិបានប្រកាសពីការកើនឡើងនៃជំងឺធ្លាក់​ឈាម ដោយសារ​វីរុស​​នោះ​​វាយប្រហារ​ផ្ដាច់សរសៃឈាម​ ​ដែលឆ្លងខ្លាំងនៅភាគខាងកើតនៃប្រទេសនេះ ​ថាជាគ្រាអាសន្នសុខភាពអន្តរជាតិ។​​

មិនមានវ៉ាក់សាំង ឬការព្យាបាលសម្រាប់ជំងឺអេបូឡាប្រភេទ Bundibugyo ដែលជាដើម​ចម​​នាំ​ឲ្យមានការ​ផ្ទុះឡើងនៃជំងឺនេះទេ។

ជំងឺអេបូឡាបានសម្លាប់មនុស្សជាង ១៥.០០០នាក់នៅទ្វីបអាហ្វ្រិកក្នុងរយៈពេលកន្លះសតវត្សរ៍កន្លងមកនេះ។

មន្ត្រី​ ​​ដែលកំពុងត្រួតពិនិត្យការងារនេះបាននិយាយថា ពួកលោក​​​កំពុងរាយខ្សាច់ និងរៀបចំទីតាំងដើម្បីជួយថែទាំមនុស្សដែលរងផលប៉ះពាល់ដោយជំងឺ​អេបូឡា។

វីដេអូក្នុងស្រុករបស់អង្គការសុខភាពពិភពលោកបានបង្ហាញថា សម្ភារៈវេជ្ជសាស្ត្រសង្គ្រោះបន្ទាន់រាប់តោន រួមទាំងឧបករណ៍បង្ការ​ការឆ្លងមេរោគ និងតង់ ក៏ដូចជា​​​​ក្រុ​ម​អ្នកជំនាញបានទៅ​ដល់ក្នុងរយៈពេលប៉ុន្មានថ្ងៃថ្មីៗនេះ។​ ​

លោក Samuel Roger Kamba រដ្ឋមន្ត្រីក្រសួងសុខាភិបាលកុងហ្គោ បានប្រាប់ក្រុមអ្នកសារ​​ព័ត៌មានកាលពីថ្ងៃអង្គារថា មានអ្នកស្លាប់ចំនួន ១៣៦ នាក់ ដែលសង្ស័យថាមានទំនាក់ទំនងជាមួយនឹងជំងឺអេបូឡា និងករណីសង្ស័យប្រហែល ៥៤៣ នាក់​​ ដោយអំពាវនាវឱ្យមានជំនួយអន្តរជាតិដើម្បីជួយប្រយុទ្ធប្រឆាំងនឹងការរីករាលដាល​ជំងឺ​​នេះ​ ៕