កងទ័ពអ៊ីរ៉ង់បានព្រមានកាលពី​ថ្ងៃអង្គារ ១៩ ឧសភា​​សប្ដាហ៍​នេះ​​​ ថាខ្លួននឹងបើកសមរភូមិ​ថ្មី ​ប្រឆាំងនឹងសហរដ្ឋអាមេរិក ប្រសិនបើបន្តការវាយប្រហារ បន្ទាប់ពីប្រធានាធិបតី​​ Donald Trump បាននិយាយថា លោកបានផ្អាក​ការវាយលុកថ្មី ដោយសង្ឃឹមថានឹងសម្រេចបានកិច្ចព្រមព្រៀងមួយ។

ការព្រមាននេះបានកើតឡើងស្រប​​ពេលមានបទឈប់បាញ់ដ៏រង្គោះរង្គើចាប់តាំងពីថ្ងៃទី៨ ខែមេសា ២០២៦ ​នេះ ​ដោយទីក្រុងវ៉ាស៊ីនតោន និងទីក្រុងតេអេរ៉ង់ បានផ្លាស់ប្តូរសំណើក្នុងកិច្ចខិតខំប្រឹងប្រែងដើម្បីបញ្ចប់សង្គ្រាមមជ្ឈិមបូព៌ា ដែលបានចាប់ផ្តើមកាលពី​ថ្ងៃទី២៨ កុម្ភៈ​​ឆ្នាំ​នេះ​។

នៅក្នុងការបង្ហោះមួយលើបណ្ដាញ​សង្គម​ Truth Social របស់លោក លោក Trump បាននិយាយថា ក្រុមមេដឹកនាំឈូងសមុទ្របានស្នើសុំឱ្យលោក​ផ្អាក​ការវាយប្រហារយោធាតាម​ផែនការ​​របស់អាមេរិក​លើសាធារណរដ្ឋអ៊ីស្លាមអ៊ីរ៉ង់ ដែលត្រូវបានគ្រោងទុកសម្រាប់ថ្ងៃពុធ​សប្ដាហ៍នេះ​ ​ហើយ​ថា​​ការចរចា​​ច្បាស់​លាស់​កំពុង​កើតឡើង​។​

ប៉ុន្តែលោក Trump បានបន្ថែមថា លោកបានណែនាំយោធាអាមេរិកឱ្យត្រៀមខ្លួនរួចជាស្រេចដើម្បីបន្តការវាយប្រហារទ្រង់ទ្រាយធំទាំងស្រុងលើអ៊ីរ៉ង់ភ្លាមៗ ក្នុងករណី​​កិច្ចព្រមព្រៀងដែលអាចទទួលយកបាន មិនត្រូវបានសម្រេច​ទេ​នោះ​។​

កាលពី​ថ្ងៃអង្គារដដែល​​ អ្នកនាំពាក្យកងទ័ពអ៊ីរ៉ង់ លោក Mohammad Akraminia បានព្រមាន បើកសមរភូមិ​ថ្មីប្រឆាំងនឹងសហរដ្ឋអាមេរិក ប្រសិនបើបន្តការវាយប្រហារលើសាធារណរដ្ឋអ៊ីស្លាម។

លោកបានបន្ថែមថា យោធាអ៊ីរ៉ង់បានប្រើប្រាស់បទឈប់បាញ់ជាឱកាសមួយដើម្បីពង្រឹងសមត្ថភាពប្រយុទ្ធរបស់ខ្លួន ដោយមិនបានពន្យល់លម្អិតនោះទេ៕