ក្រសួងសុខាភិបាលលីបង់បាននិយាយថា ការវាយប្រហារតាមអាកាសរបស់អ៊ីស្រាអែលលើភាគខាងត្បូងប្រទេសលីបង់កាលពីថ្ងៃអង្គារ ​១៩​​ ​ឧសភា ​បានសម្លាប់មនុស្សយ៉ាងហោចណាស់ ១៩ នាក់ រួមទាំងស្ត្រី ៤ នាក់ និងកុមារ ៣ នាក់ ​ជាការវាយប្រហារចុងក្រោយបំផុតស្ទើរតែរាល់ថ្ងៃពីភាគីទាំងពីរដែលមិនទាន់បានបញ្ឈប់ទោះបីជាមានបទឈប់បាញ់ដ៏​ផុយស្រួយ និងសម្របសម្រួលដោយសហរដ្ឋអាមេរិកក៏ដោយ។​

យោធាអ៊ីស្រាអែលពុំបានធ្វើអត្ថាធិប្បាយភ្លាមៗអំពីអ្នកស្លាប់ និងរបួស ឬឧបទ្ទ​វប​ហេតុជាក់លាក់នោះទេ ប៉ុន្តែបាននិយាយថា ចន្លោះពីរសៀលថ្ងៃចន្ទ ដល់រសៀលថ្ងៃអង្គារ ខ្លួនបានកំណត់គោលដៅលើទីតាំងហេដ្ឋារចនាសម្ព័ន្ធហេសបូឡាជាង ២៥ កន្លែងនៅភាគខាងត្បូងប្រទេសលីបង់។ ​

ការប្រយុទ្ធគ្នាចុងក្រោយរវាងអ៊ីស្រាអែល និងហេសបូឡាបានចាប់ផ្តើមនៅថ្ងៃទី ២ ខែមីនា​២០២៦​​ ដោយក្រុមសកម្មប្រយុទ្ធលីបង់បានបាញ់រ៉ូកែត​ទៅលើអ៊ីស្រាអែល ពីរថ្ងៃបន្ទាប់ពីសហរដ្ឋអាមេរិក និងអ៊ីស្រាអែលបានវាយប្រហារអ៊ីរ៉ង់។

នៅទីក្រុងបេរូត រដ្ឋាភិបាលបាននិយាយថា ការវាយប្រហារតែមួយលើកលើភូមិ Deir Qanoun al Nahr ក្នុងខេត្ត Tyre ឆ្នេរសមុទ្របានសម្លាប់មនុស្ស ១០ នាក់ រួមទាំងកុមារ ៣ នាក់ និងស្ត្រី ៣ នាក់។ បីនាក់បានរងរបួស រួមទាំងកុមារម្នាក់ផងដែរ។

ចំនួន​អ្នក​ស្លាប់​ថ្មី​​​បាន​កើត​ឡើង​មួយ​ថ្ងៃ​បន្ទាប់​ពី​ចំនួន​អ្នក​ស្លាប់​ក្នុង​ការ​ប្រយុទ្ធ​គ្នា​ជុំ​ចុង​ក្រោយ​រវាង​អ៊ីស្រាអែល និង​ក្រុម​​ហេសបូឡា​ ​​បាន​កើន​លើស ៣.០០០​នាក់​​ និង​ពីរ​ថ្ងៃ​បន្ទាប់​ពី​បទ​ឈប់​បាញ់​​សម្របសម្រួល​ដោយ​សហរដ្ឋអាមេរិក ដែល​បាន​ធ្វើ​ឡើង​ចាប់​តាំង​ពី​ថ្ងៃ​ទី១៧​​មេសា ត្រូវ​បាន​ពន្យារ​ពេល​រយៈពេល ៤៥ថ្ងៃ៕