ប្រទេសអារ៉ាប់រួម កាលពីថ្ងៃអង្គារ ទី១៩ ខែឧសភា បាននិយាយថាយានដ្រូនដែលបានកំណត់គោលដៅលើរោងចក្រថាមពលនុយក្លេអ៊ែររបស់ខ្លួនកាលពីសប្តាហ៍មុន បានចេញមកពីប្រទេសអ៊ីរ៉ាក់ ជាកន្លែងដែលក្រុមគាំទ្រដោយអ៊ីរ៉ង់ បានបើកការវាយប្រហារជាច្រើនលើកចាប់តាំងពីសង្គ្រាមនៅមជ្ឈិមបូព៌ា ចាប់ផ្តើម។ កាលពីថ្ងៃអាទិត្យ យានដ្រូនដែលមិនត្រូវបានបញ្ជាក់អត្តសញ្ញាណ បានវាយប្រហារម៉ាស៊ីនភ្លើងនៅជិតរោងចក្រថាមពលនុយក្លេអ៊ែរតែមួយគត់របស់ពិភពអារ៉ាប់ នៅតំបន់ Barakah ក្នុងទីក្រុង Abu Dhabi បង្កឱ្យមានអគ្គិភ័យ ប៉ុន្តែមិនបណ្តាលឱ្យមានអ្នករងរបួស ឬការលេចធ្លាយសារធាតុវិទ្យុសកម្មទេ។

តំបន់ Barakah ស្ថិតនៅជិតព្រំដែនប្រទេសអារ៉ាប៊ីសាអ៊ូឌីត និងប្រទេសកាតា ហើយការវាយប្រហារនេះបានបង្កើនការព្រួយបារម្ភចំពោះផលវិបាកនៅទូទាំងឈូងសមុទ្រ។ ក្រសួងការពារជាតិប្រទេសអារ៉ាប់រួមបាននិយាយថា «ជាផ្នែកមួយនៃការស៊ើបអង្កេតជាបន្តបន្ទាប់លើការវាយប្រហារដោយចេតនាលើរោងចក្រថាមពលនុយក្លេអ៊ែរ Barakah នៅថ្ងៃទី១៧ ខែឧសភា ឆ្នាំ២០២៦ ការតាមដាននិងត្រួតពិនិត្យបច្ចេកទេស បានបញ្ជាក់ថាយានដ្រូន៣គ្រឿង ទាំងអស់នេះមានប្រភពមកពីទឹកដីប្រទេសអ៊ីរ៉ាក់»។

ក្រសួងបាននិយាយបន្ថែមថា អាជ្ញាធរបានស្ទាក់ចាប់យានដ្រូនចំនួន៦គ្រឿងមានប្រភពមកពីប្រទេសអ៊ីរ៉ាក់ ដែលបានកំណត់គោលដៅលើតំបន់ស៊ីវិល និងតំបន់សំខាន់ៗ។

អ៊ីរ៉ង់ បានវាយប្រហារប្រទេសអារ៉ាប់រួម និងប្រទេសឈូងសមុទ្រដទៃទៀត ចាប់តាំងពីសហរដ្ឋអាមេរិក និងអ៊ីស្រាអែល បានបើកការវាយប្រហារលើអ៊ីរ៉ង់នៅថ្ងៃទី២៨ ខែកុម្ភៈ ដោយកំណត់គោលដៅលើមូលដ្ឋានរបស់សហរដ្ឋអាមេរិក ប៉ុន្តែក៏មានហេដ្ឋារចនាសម្ព័ន្ធថាមពល និងស៊ីវិលផងដែរ។ មុនពេលបទឈប់បាញ់នៅថ្ងៃទី៨ ខែមេសា ចូលជាធរមាន ក្រុមនៅអ៊ីរ៉ាក់ដែលគាំទ្រដោយទីក្រុងតេអេរ៉ង់ បានធ្វើអន្តរាគមន៍គាំទ្រអ៊ីរ៉ង់ និងបានវាយប្រហារលើមូលដ្ឋានរបស់សហរដ្ឋអាមេរិកនៅក្នុងប្រទេសអ៊ីរ៉ាក់ និងតំបន់ដ៏ទូលំទូលាយ រួមទាំងប្រទេសឈូងសមុទ្រផងដែរ។