ក្រោយប្រទេសថៃបានបិទព្រំដែនជាឯកតោភាគី ហើយពលរដ្ឋ​ខ្មែរ​បន្ត​ធ្វើ​ពហិការ​ឈប់​ប្រើ​ប្រាស់​ទំនិញ​ថៃ​រយៈពេលជិត ១ឆ្នាំ​មកនេះ ដំណើរការដោះដូរទំនិញ និង​ការ​ទិញ​លក់​តាម​បណ្តា​ផ្សារ​នានា​នៅ​ភ្នំពេញ ​ដូចជាផ្សារអូរឫស្សី ផ្សារធំថ្មី និងផ្សារឈូកមាសជាដើម នៅតែ​រក្សា​បាន​សភាព​ល្អ​ប្រសើរ ព្រមទាំងមានសណ្តាប់ធ្នាប់ល្អប្រសើរ ខណៈសន្ទុះ​ពហិការ​ទំនិញ​ថៃរ​បស់​ពលរដ្ឋ​បន្ត​កើន​ឡើង​ខ្លាំង។

ជួបសម្ភាសន៍ជាមួយក្រុមប្រជាពលរដ្ឋដែលជាអាជីវករនៅផ្សារឈូកមាស ស្ថិតនៅខណ្ឌសែនសុខ រាជ​ធានីភ្នំពេញ នៅព្រឹកថ្ងៃទី២០ ខែឧសភា ឆ្នាំ២០២៦នេះ ពួកគាត់បាននិយាយឱ្យដឹងថា សព្វ​ថ្ងៃ​នេះ​តាម​ការមើលឃើញជាក់ស្តែង ទាំងម្ហូបអាហារ របស់របរប្រើប្រាស់ ស្លៀកពាក់ និង​សម្ភា​រៈ​ផ្សេង​ៗ ​គឺមានច្រើនសន្ធឹកសន្ធាប់ណាស់ ដែលមិនបង្ក​ឱ្យ​មា​ន​កា​រ​ខ្វះខា​ត​ក្នុង​ការ​ទិញល​ក់​នោះ​ទេ។​

ក្រុមអាជីវករផ្សារ បានលើកឡើងស្រដៀងគ្នាទៀតថា បើនិយាយ​ដល់​ការ​រក​ប្រាក់​ចំណូល​ពី​ការ​លក់​ដូរ​សព្វ​ថ្ងៃ ​ទោះបីជាមានការថយចុះ ប៉ុន្តែនៅតែអាចប្រកបរបរលក់ដូរបានជាធម្មតា គ្រាន់​តែ​ថ្ងៃ​ខ្លះ​ដាច់​អស់​ច្រើន និងថ្ងៃខ្លះលក់ដាច់តិច តែប៉ុណ្ណោះ។

ក្រុមអាជីវករ បាន​សម្តែងការអរគុណរាជរដ្ឋាភិបាលកម្ពុជា ចំពោះការបន្តដឹកនាំ​ប្រទេស​ជាតិ​រស់​នៅ​ក្នុង​សុខ​សន្តិភាព។ ឆ្លៀតក្នុងឱកាសនេះ ក្រុមអាជីវករ ក៏បានផ្ញើរសារលើក​ទឹក​ចិត្ត​ដល់​​កង​ទ័ព​ជួរ​មុខទាំងអស់បំពេញការងារប្រកបដោយភាពជោគជ័យគ្រប់ភារកិច្ច និង​អំពា​វនាវ​ដល់​ប្រជា​ពលរដ្ឋ​ខ្មែរ​ទាំង​អស់បន្តប្រើប្រាស់និងលើកកម្ពស់ផលិតផលក្នុងស្រុកឱ្យបានច្រើនជាងការនាំចូល ដើម្បី​ថែ​សេដ្ឋកិច្ចជាតិឱ្យល្អប្រសើរ។

គួររម្លឹកថា គិតមកដល់បច្ចុប្បន្ននេះ រយៈពេលជិត១ឆ្នាំហើយ ដែល​ភាគី​ថៃ​បាន​សម្រេច​ជា​ឯក​តោ​ភាគី​បិទ​ច្រក​របៀងព្រំដែនគោកជាមួយកម្ពុជា កាលពីថ្ងៃទី៧ ខែមុថុនា ឆ្នាំ២០២៥។ ពាក់ព័ន្ធ​ការ​បិទ​ច្រក​ព្រំដែន​នេះ​ដែរ ប្រទេសកម្ពុជាក៏បាន​សម្រេច​ផ្អាក​ការ​នាំ​ចូល​ដាច់​ខាត​នូវ​មុខ​ទំនិញ​មួយ​ចំនួន​ពី​ប្រទេស​ថៃ ​ដូចជា៖ បន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈ៕ អត្ថបទ៖ ឈិត បូរ៉ាវី