នាថ្ងៃពុធ (ទី២០ ខែឧសភា ឆ្នាំ២០២៦) នេះ ប្រធានាធិបតី លោក Vladimir Putin បានប្រាប់សមភាគីចិនរបស់លោក គឺលោកស៊ី ជីនពីង (Xi Jinping) នៅទីក្រុងប៉េកាំងថា ចំណង​ទាក់ទង​ រវាង​ប្រទេស​រុស្ស៊ី និង​ចិន​ ស្ថិតក្នុង​កម្រិត​មិន​ធ្លាប់មាន​ពីមុន​ ហើយលោក​បានអញ្ជើញមេដឹកនាំចិន​ឲ្យ​​ទៅទស្សនកិច្ចនៅ​រុស្ស៊ីឆ្នាំក្រោយ។

រូប​ភាព​វីដេអូពីប្រព័ន្ធផ្សព្វផ្សាយរុស្ស៊ី បានបង្ហាញថា នៅពេលដែលពួក​លោក​បានជួបគ្នានៅមហាសាលប្រជាជនចិន​ លោក Putin បាននិយាយទៅកាន់​លោក ស៊ី ថា៖ «ថ្ងៃនេះ ទំនាក់ទំនងរបស់ពួក​យើង បានឈានដល់កម្រិតខ្ពស់មិនធ្លាប់មានពីមុនមក ដែលបម្រើជាគំរូនៃភាពជាដៃគូគ្រប់ជ្រុង​ជ្រោយ​ និងកិច្ចសហប្រតិបត្តិការជាយុទ្ធសាស្ត្រ។ សូម្បីតែក្នុងពេល​ដែល​កត្តាខាងក្រៅមិនអំណោយផលក៏ដោយ ក៏​កិច្ចសហប្រតិបត្តិការ និងកិច្ចសហប្រតិបត្តិការសេដ្ឋកិច្ចរបស់ពួក​យើង កំពុងបង្ហាញពីសន្ទុះវិជ្ជមាន និងរឹងមាំ»។

ចំណែក​លោក ស៊ី វិញ​ បានសាទរចំពោះ «ទំនាក់ទំនងដ៏រឹងមាំ» រវាងចិន និងរុស្ស៊ី។ បើយោងតាមទីភ្នាក់ងារសារព័ត៌មាន Xinhua បាន​ឲ្យ​ដឹង​ថា លោកស៊ី បានប្រាប់ទៅ​លោក Putin ​ថា៖ «យើងអាចបន្តពង្រឹងទំនុកចិត្តគ្នាទៅវិញទៅមក ទាំង​ផ្នែក​នយោបាយ និងការសម្របសម្រួលជាយុទ្ធសាស្ត្ររបស់យើងជាមួយនឹងភាពធន់ដែលនៅតែរឹងមាំ ទោះបីជាមានការលំបាក និងភាព​ច្របូក​ច្របល់​ក៏ដោយ»។

បើយោង​តាមប្រព័ន្ធផ្សព្វផ្សាយរដ្ឋចិន បាន​ឲ្យ​ដឹង​ទៀង​ថា ជាមួយ​គ្នានេះ លោក ស៊ី ក៏បានប្រាប់មេដឹកនាំ​រុស្ស៊ី​​ផងដែរថា ការមាន​អរិភាពបន្ថែមទៀត នៅតំបន់​មជ្ឈិមបូព៌ា «មិនត្រូវ​កើត​ឡើង​ឡើយ»។ លោកបានបន្ថែមថា ការបញ្ឈប់សង្គ្រាម នឹងជួយកាត់បន្ថយការរំខានដល់ស្ថិរភាពនៃការផ្គត់ផ្គង់ថាមពល ក៏ដូចជាសណ្តាប់ធ្នាប់ពាណិជ្ជកម្មអន្តរជាតិផង​ដែរ​។

គួរបញ្ជាក់​ថា លោក Putin បានចាប់ផ្តើមទស្សនកិច្ចផ្លូវ​រដ្ឋ​រយៈពេល ២ថ្ងៃទៅកាន់ប្រទេសចិន កាលពីថ្ងៃអង្គារ ដោយដំណើរ​នេះ​កើត​ឡើង​​ប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump ទើប​បានចាក​ចេញ​ពី​ទីក្រុង​ប៉េកាំង ក្រោយ​បញ្ចប់ទស្សនកិច្ច​ ៣ថ្ងៃ​​៕