ភ្នំពេញ​៖ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បានយកចិត្តទុកដាក់សហការជាមួយ បណ្តាមនី្ទរសុខាភិបាលរាជធានី-ខេត្ត ផ្តល់សេវាចាក់វ៉ាក់សាំងបង្ការជំងឺកូវីដ-១៩ នៅតាមវត្តអារាម ជូនដល់បងប្អូនប្រជាពលរដ្ឋ ដើម្បីពង្រឹងភាពស៊ាំបុគ្គល និងសហគមន៍ នាឱកាសបុណ្យ ចូល ឆ្នាំថ្មី ប្រពៃណីជាតិខ្មែរ។

ឯកឧត្តម លេង ផាលី ប្រធានប្រតិបតិ្តក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ប្រាប់BTV ព័ត៌មាន នាព្រឹកថ្ងៃទី១៨ ខែមេសា ឆ្នាំ២០២២នេះថានាឱកាសដែលបងប្អូន ប្រជាពលរដ្ឋ ក្មេង ចាស់ ប្រុស ស្រី បានចូលរួមសប្បាយរីករាយក្រោមម្លប់សន្តិភាពនៃពិធីបុណ្យ ចូលឆ្នាំថ្មី ប្រពៃណីជាតិខ្មែរ ជាពិសេសការជួបជុំក្រុមគ្រួសារ ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី នៅតែបន្តបេសកកម្មរបស់ខ្លួន ដោយបានចុះទៅតាមបណ្តារាជធានី-ខេត្ត ចាក់វ៉ាក់សាំងជំងឺកូវីដ-១៩ ដូសទី១ ដូសទី២ ដូសទី៣ និងដូសទី៤ ជូនកុមារ យុវវ័យ ប្រជាពលរដ្ឋនៅតាមវត្តអារាម ក្នុងស្មារតីទទួលខុសត្រូវខ្ពស់ ក្នុងបំណងតែមួយគត់ គឺដើម្បីពង្រឹងភាពស៊ាំងបុគ្គលក្នុងសហគមន៍ នាឱកាសបុណ្យចូលឆ្នាំថ្មី ប្រពៃណីជាតិ។ ជាពិសេសក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចំនួន២៥៦៣នាក់ បច្ចុប្បន្នបានចូល រួមយុទ្ធនាការចាក់វ៉ាក់សាំងបង្កាកូវីដ-១៩ ក្នុងក្របខណ្ឌទូទាំងប្រទេស ដោយឥតគិតថវិកា បេសកកម្ម ចំនួន១៦រាជធានី-ខេត្ត រួមមាន រាជធានីភ្នំពេញ ខេត្តកណ្តាល ខេត្តព្រះសីហនុ ខេត្តពោធិ៍សាត់ ខេត្តកោះកុង ខេត្តឧត្តរមានជ័យ ខេត្តស្វាយរៀង ខេត្តសៀមរាប ខេត្តមណ្ឌលគិរី ខេត្តព្រះវិហារ ខេត្តត្បូងឃ្មុំ ខេត្តស្ទឹងត្រែង ខេត្តរតនគិរី ខេត្តតាកែវ ខេត្តកំពង់ធំ និងខេត្តព្រៃវែង ដោយទទួលបានលទ្ធផលសរុប៖ ៧,២៨៥,៤៣៨ដូស (ប្រាំពីរលាន ម្ភៃប្រាំបីម៉ឺន ប្រាំពាន់ បួនរយ សាមសិប ប្រាំបីដូស)។

ឯកឧត្តម លេង ផាលី បានលើកឡើងទៀតថា រយៈពេល១០ឆ្នាំកន្លងមក គិតចាប់ពីថ្ងៃបង្កើត (០២ ធ្នូ ២០១២ ដល់ ១៨ មេសា ឆ្នាំ២០២២) ក្រោមការដឹកនាំចង្អុលបង្ហាញដោយផ្ទាល់ និងការ ឧបត្ថម្ភ គាំទ្រទាំងស្មារតី និងសម្ភារៈពីសំណាក់បងប្រធាន ហ៊ុន ម៉ានី ក្រុមការងារ គ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី បានពិនិត្យ និងព្យាបាលជំងឺជូនប្រជាពលរដ្ឋបានចំនួន៥៧៤លើក ដោយមានគ្រូពេទ្យស្ម័គ្រចិត្តចូលរួមចំនួន ៦,៧៧៩នាក់ (ប្រាំពាន់ប្រាំមួយរយចិតសិបប្រាំបួននាក់) ក្នុងនោះ ស្ត្រីមាន ចំនួន ៣,៦៩៦នាក់ (បីពាន់ពីររយសាមសិបមួយនាក់) បានពិនិត្យ និងព្យាបាលព្រម ទាំងចែក ថ្នាំដោយឥតគិតថ្លៃជូនប្រជាពលរដ្ឋបានចំនួន ៧,៨៧៦,៤៥១នាក់ (ប្រាំពីរលាន ប៉ែតសិបប្រាំពីរម៉ឺន ប្រាំមួយពាន់ បួនរយ ហាសិបមួយនាក់) ក្នុងនោះស្ត្រីមានចំនួន ៤,២១៩,៤៩៧នាក់ (បួនលាន ម្ភៃមួយម៉ឺន ប្រាំបួនពាន់ បួនរយ កៅសិបប្រាំពីរនាក់ ) ក្នុង២៥រាជធានី-ខេត្ត ស្មើ១ ភាគ២ នៃប្រជាជនសរុប ទូទាំងប្រទេសចំនួន ១៥,៥៥២,២២១នាក់ (ដប់ប្រាំលាន ហាសិបប្រាំម៉ឺនពីរពាន់ពីររយ ម្ភៃ មួយនាក់)។

ឯកឧត្តម បានបញ្ជាក់ទៀតថា ការងារមនុស្សធម៌ចុះជួយប្រជាពលរដ្ឋ រៀងរហូតមកគឺកើតចេញពីការឧបត្ថម្ភគាំទ្រ និងការចង្អុលបង្ហាញផ្ទាល់ពីសំណាក់ឯកឧត្តម ហ៊ុន ម៉ានី ដែលលោកតែងតែខ្វល់ខ្វាយគិតគូរ និងរួមសុខរួមទុក្ខជាមួយប្រជាពលរដ្ឋដែលជួបការលំបាកគ្រប់កាលទេសៈ។ ជាពិសេសសកម្មភាពទាំងនេះអាចប្រព្រឹត្តទៅបានក៏ដោយសារប្រទេសជាតិមានស្ថេរភាព និង សុខ សន្តិភាពពេញលេញក្រោមការដឹកនាំប្រកបដោយគតិបណ្ឌិតរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា៕​ អត្ថបទ ៖ រដ្ឋា