ប្រធានាធិប​តី​ចិន លោក ស៊ី ជីនពីង (Xi Jinping) បានប្រាប់សមភាគី​របស់លោក គឺ​លោក Vladimir Putin ថា ពិភពលោកកំពុងស្ថិតក្នុងគ្រោះថ្នាក់ ដោយសារ​ការដើរថយក្រោយទៅរក «ច្បាប់ព្រៃ» ខណៈដែលលោកបានព្យាយាមពណ៌នាទីក្រុងប៉េកាំងថា ជាកម្លាំងនៃស្ថិរភាពសកល ដោយ​ការ​លើក​ឡើង​នេះ កើត​មាន​ត្រឹមតែប៉ុន្មានថ្ងៃបុណ្ណោះ​ បន្ទាប់ពីធ្វើជាម្ចាស់ផ្ទះទទួលមេដឹកនាំ​អាមេរិក លោក Donald Trump សម្រាប់កិច្ចប្រជុំកំពូល។

នៅទីក្រុងប៉េកាំង នា​​ថ្ងៃពុធ (ទី២០ ខែឧសភា ឆ្នាំ២០២៦) នេះ ក្នុង​ជំនួប​កំពូល​របស់​​មេដឹកនាំ​ទាំង២ លោក ស៊ី និងលោក Putin បានចុះហត្ថលេខា លើសេចក្តីថ្លែងការណ៍រួមមួយ ស្តីពីការបង្កើនបន្ថែមទៀតនូវការសម្របសម្រួលយុទ្ធសាស្ត្រគ្រប់ជ្រុង​ជ្រោយ​ និងការពង្រឹងភាពជាអ្នកជិតខាងល្អ និងកិច្ចសហប្រតិបត្តិការមិត្តភាព រវាងប្រទេសទាំង២។

មេដឹកនាំរុស្ស៊ី និងចិន បានជួបគ្នានៅទីលានធានអានមិន (Tiananmen Square) នៅ​ថ្ងៃពុធ មុនពេលបើក​កិច្ចពិភាក្សាទ្វេភាគី នៅមហា​សាលប្រជាជនចិន​ និងមាន​ពិធីជប់លៀងផ្លូវ​រដ្ឋ។ ជំនួប​កំពូលនេះ មានគោលបំណងបញ្ជាក់ជាថ្មីនូវទំនាក់ទំនងចិន-រុស្ស៊ី នៅពេលដែលទីផ្សារថាមពលសកល និងខ្សែច្រវាក់ផ្គត់ផ្គង់ ត្រូវបានរំខាន ដោយសារសង្គ្រាមអាមេរិក-អ៊ីស្រាអែល លើអ៊ីរ៉ង់។

ក្នុង​ជំនួប​ទល់​មុខនេះ លោក ស៊ី បានប្រាប់លោក Putin ថា វិបត្តិនៅឈូងសមុទ្រ កំពុងស្ថិតនៅ «ដំណាក់​កាល​ដ៏សំខាន់» ហើយបានបញ្ជាក់ជាថ្មីនូវការអំពាវនាវឲ្យ​បញ្ចប់ការប្រយុទ្ធគ្នា ដើម្បីជួយធ្វើឲ្យ​មានស្ថិរភាពដល់​ការផ្គត់ផ្គង់ថាមពល និងពាណិជ្ជកម្មអន្តរជាតិ។ នេះបើយោងតាមការ​អត្ថាធិប្បាយ​ដែលបានចេញផ្សាយដោយទីភ្នាក់ងារសារព័ត៌មានចិន Xinhua។

យ៉ាង​ណាក្ដី​ ដោយ​លើកឡើង​ពី​ទំហំ​ពាណិជ្ជកម្ម​ជាង ២០០ពាន់​លាន​ដុល្លារ និង​កិច្ចសហប្រតិបត្តិការ​កាន់តែ​ស៊ីជម្រៅ​ លើ​ថាមពល​​ មេដឹកនាំ​ចិន​​បាន​មានប្រសាសន៍បន្ថែម​​ថា៖ «ទោះបីជា​មាន​កត្តា​មិន​អំណោយផល ​នៅលើ​ឆាក​អន្តរជាតិ​ក៏ដោយ ក៏​ទំនាក់ទំនង​ទ្វេភាគី​របស់​ប្រទេស​ទាំង​២ ​បាន​បន្ត​អភិវឌ្ឍ​ជា​បន្តបន្ទាប់»៕