កាល​ពី​ថ្ងៃអង្គារ (ទី១៩ ខែឧសភា ឆ្នាំ២០២៦) អនុប្រធានាធិបតីអាមេរិក លោក J.D. Vance បានធានាដល់ជនជាតិអាមេរិកថា សង្គ្រាមជាមួយអ៊ីរ៉ង់ នឹងមិនក្លាយជា «ការ​ប្រយុទ្ធ​គ្នា​ជារៀងរហូត» នោះ​ទេ ដោយប្រើប្រាស់សន្និសីទសារព័ត៌មាននៅសេតវិមាន ដើម្បីការពារគោលនយោបាយរបស់លោក​ប្រធានាធិបតី Donald Trump ​ ខណៈដែលការរំពឹងទុក ដែល​ថា រូប​លោក​គឺ​ជា​អ្នក​​ស្នងតំណែងនាពេល​ខាង​មុខ ​កំពុងកើនឡើង​។

ដោយធ្វើ​សន្និសីទ​ជំនួសអ្នក​នាំ​ពាក្យ​ គឺ​លោកស្រី​ Karoline Leavitt ដែលកំពុងឈប់សម្រាកលំហែមាតុភាព លោក Vance បានឆ្លើយសំណួររបស់​​អ្នកសារព័ត៌មាន អស់រយៈពេលជិត ១ម៉ោង ជា​ការ​និយាយ​ស្ដី​ភាគច្រើន​មាន​ភាព​ប្រាកដប្រជា និង​ប្រយ័ត្ន​ប្រយែង ដែល​ផ្ទុយពីការ​ប្រើ​ប្រាស់​ពាក្យ​ពេចន៍​ខ្លាំងៗ និង​ហិង្សា​របស់លោក Trump។

​នៅ​ខែឧសភានេះ បន្ទប់សន្និសីទសារព័ត៌មាន​ នៅ​សេតវិមាន ​បានលេចឡើង​ជាដំណាក់កាល​សវនកម្ម​ក្រៅផ្លូវការ​មួយ ​ក្នុងដំណើរ​ការប្រជែងដណ្ដើម​តំណែងជំនួស​លោក Trump ក្នុងឆ្នាំ២០២៨។ ការបង្ហាញខ្លួនរបស់លោក Vance នៅលើវេទិកា​នេះ បានកើតឡើងក្រោយ​ប្រហែល ២សប្តាហ៍បន្ទាប់ពីរដ្ឋមន្ត្រីការបរទេស លោក Marco Rubio ដែលជាគូប្រជែងនាពេលអនាគតរបស់លោក​ បានទាក់ទាញឲ្យ​មាន​ការចាប់អារម្មណ៍យ៉ាងទូលំទូលាយ សម្រាប់ការ​មាន​វត្តមាន​លើកដំបូងរបស់លោក​។

កាលពីថ្ងៃទី១៩​ ខែឧសភា អតីតទាហានម៉ារីន លោក Vance វ័យ​ ៤១ឆ្នាំ ដែលបានជំទាស់​ជាយូរមកហើយ ប្រឆាំងនឹងការជាប់ពាក់ព័ន្ធរបស់សហរដ្ឋអាមេរិក នៅក្នុងសង្គ្រាមបរទេស បាននិយាយថា ការកើនឡើងភាព​តាន​តឹង​ណាមួយជាមួយទីក្រុងតេអេរ៉ង់ ប្រសិន​បើ​គ្មានដំណោះស្រាយការទូត នឹងជួយ​ការពារ​ផលប្រយោជន៍សន្តិសុខរយៈពេលវែងរបស់សហរដ្ឋអាមេរិក។ លោក​បានសង្កត់ធ្ងន់​ថា «នេះមិនមែនជាសង្គ្រាមជារៀងរហូតនោះ​ទេ។ យើងនឹងសម្រេច​កិច្ចការ​របស់​យើង​ ហើយវិល​ត្រឡប់មកប្រទេស​វិញ»។

គួរ​បញ្ជាក់​ថា ចាប់តាំងពីភ្លើង​សង្គ្រាម​បានចាប់ផ្តើមឆាប​ឆេះ​ឡើង​កាល​ពី​ថ្ងៃទី២៨​ ខែកុម្ភៈ ជម្លោះ​នេះ​បានរំខាន​ពាណិជ្ជកម្មប្រេងឥន្ធនៈសកលមួយផ្នែកធំ ដែលធ្វើឲ្យតម្លៃប្រេងសាំងអាមេរិក ហក់​ឡើងប្រហែល ៥០​ភាគរយ និងបង្កើនការព្រួយបារម្ភ ក្នុងចំណោមក្រុម​សាធារណរដ្ឋ ដែលការពារសំឡេងភាគច្រើន នៅក្នុងសភា អំឡុង​ការបោះឆ្នោតពាក់កណ្តាលអាណត្តិខែវិច្ឆិកា៕