លោកប្រធានាធិបតីសហរដ្ឋអាមេរិក Donald Trump នឹងចូលរួមកិច្ចប្រជុំមេដឹកនាំនៃ​ក្រុម​ប្រទេស​មាន​ឧស្សាហកម្ម​ឈាន​មុខ​គេ​​ទាំង៧ (G7) នៅប្រទេសបារាំង នា​ខែមិថុនា ដែល​រូប​លោក​ននឹងនិយាយ​អំពីបញ្ញាសិប្បនិម្មិត (AI) ពាណិជ្ជកម្ម និងការប្រយុទ្ធប្រឆាំងឧក្រិដ្ឋកម្ម។​ នេះបើយោងតាមរបាយការណ៍របស់សារព័ត៌មាន​ Axios កាលពីថ្ងៃអង្គារ (ទី១៩ ខែឧសភា ឆ្នាំ២០២៦)​ ដោយសំអាង​ដល់​សម្តីរបស់​មន្ត្រីសេតវិមានមួយ​រូប​។

សារព័ត៌មាន​ Axios បាន​ឲ្យ​ដឹងថា លោក Trump ចង់លើក​ឡើង​ អំពីការភ្ជាប់ជំនួយរបស់សហរដ្ឋអាមេរិកជាមួយនឹងពាណិជ្ជកម្ម ការលើកកម្ពស់ការអនុម័តឧបករណ៍ AI ដែលអភិវឌ្ឍដោយសហរដ្ឋអាមេរិក និងការកាត់បន្ថយការគ្រប់គ្រងរបស់ប្រទេសចិន លើខ្សែច្រវាក់​ផ្គត់ផ្គង់រ៉ែសំខាន់ៗ ក្នុងចំណោមប្រធានបទផ្សេងៗទៀត ។

គួរបញ្ជាក់​ថា ប្រទេសបារាំង គឺជាម្ចាស់ផ្ទះនៃកិច្ចប្រជុំកំពូល G7 ឆ្នាំនេះ ដោយ​កិច្ចប្រជុំកំពូលមេដឹកនាំនៅរមណីយដ្ឋានមាត់បឹង ក្នុង​ទីក្រុង​ Evian-les-Bains នៅឯ​ជើងភ្នំអាល់របស់បារាំង គ្រោងធ្វើឡើងនៅថ្ងៃទី ១៥-១៧ ខែមិថុនា។

ទំនាក់ទំនងរបស់លោក Trump ជាមួយសមាជិកជាច្រើនរបស់​ G7 កាន់តែមាន​ភាព​តានតឹងខ្លាំង​ឡើងៗ ដោយសារតែសង្គ្រាមរបស់លោកជាមួយអ៊ីរ៉ង់ ក្នុងចំណោមបញ្ហាផ្សេងៗទៀត៕