រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បាននិយាយកាលពីថ្ងៃអង្គារ (ទី​១៩ ខែឧសភា ឆ្នាំ២០២៦) ថា រដ្ឋបាលរបស់​លោកប្រធានាធិបតី​ Donald Trump «មិនប្រញាប់ប្រញាល់» នោះឡើយ​ ក្នុងការពង្រីកបន្ថែម​នូវ​ពេល​វេលា​នៃ​ការ​ផ្អាកជម្លោះ​ពាណិជ្ជកម្ម ពាក់​ព័ន្ធ​នឹង​​ពន្ធគយ និងរ៉ែសំខាន់​ៗ​ជាមួយប្រទេសចិនដែលនឹងបញ្ចប់នៅខែវិច្ឆិកា ខណៈ​មានពេលវេលា ដើម្បីបន្តវា នៅក្នុងកិច្ចប្រជុំ នា​ចុង​ឆ្នាំនេះ។

នៅក្នុង​បទសម្ភាសន៍លើកដំបូងរបស់លោក ចាប់តាំងពីបានចូលរួមកិច្ចប្រជុំកំពូលដ៏មានហានិភ័យខ្ពស់ កាលពីសប្តាហ៍មុន ជាមួយ​ប្រធានាធិបតីចិន លោក Xi Jinping នៅទីក្រុងប៉េកាំង លោក Bessent បាននិយាយថា លោកជឿជាក់ថា ប្រទេសចិននឹងទទួលយកការអត្រាពន្ធគយពីមុនរបស់សហរដ្ឋអាមេរិក តាមរយៈកាតព្វកិច្ច​​ពន្ធថ្មីមាត្រា ៣០១ ដរាបណាមិនមាន​ការ​ដំឡើងខ្ពស់ជាងនេះ។

នៅក្រៅកិច្ចប្រជុំមេដឹកនាំហិរញ្ញវត្ថុ G7 (ក្រុម​ប្រទេស​មាន​ឧស្សាហកម្ម​លូតលាស់ទាំង៧) នៅទីក្រុងប៉ារីស ប្រទេស​បារាំង លោកបាននិយាយថា ​ ប្រទេសចិនក្នុងរយៈពេលប៉ុន្មានខែថ្មីៗនេះ «ទទួលបានកិច្ចព្រមព្រៀង» ស្ដី​ពី​អត្រា​ពន្ធទាបជាងមុន​ ដោយសារ​សេចក្ដី​សម្រេចរបស់តុលាការកំពូលសហរដ្ឋអាមេរិក ដែល​លុបចោលកាតព្វកិច្ចពន្ធ​សកលបន្ទាន់របស់ប្រធានាធិបតី Donald Trump។

លោក Bessent បាននិយាយអំពីការ​ផ្អាកជម្លោះ​ពន្ធគយខែវិច្ឆិកា ឆ្នាំ២០២៥ ថា៖ «ខ្ញុំ​គិតថា យើងមិនប្រញាប់ប្រញាល់ ក្នុងការបន្ថែម​ពេល​វេលា​ទេ។ អ្វី​គ្រប់យ៉ាង​មានស្ថិរភាពល្អណាស់​»។

គួរបញ្ជាក់​ថា ការ​ផ្អាក​ជម្លោះ រវាងសហរដ្ឋអាមេរិក និងចិន ដែលបានចរចាអស់រយៈពេលជាច្រើនខែកាលពីឆ្នាំមុន បានបញ្ចៀស​ការដួលរលំទាំងស្រុងនៃពាណិជ្ជកម្ម រវាងប្រទេសដែលមានសេដ្ឋកិច្ចធំជាងគេទាំង២ របស់ពិភពលោក បន្ទាប់ពីពន្ធថ្មីរបស់លោក Trump លើទំនិញចិន បានជំរុញឲ្យ​មានការសងសឹក និងការដំ​ឡើង ដែលនាំឲ្យ​អត្រា​ពន្ធឡើង​ដល់កម្រិត​ ៣ខ្ទង់៕