រដ្ឋមន្ត្រីការបរទេសអាមេរិក លោក Marco Rubio បាននិយាយកាលពី​ថ្ងៃអង្គារ (ទី១៩ ខែឧសភា ឆ្នាំ២០២៦) ថា អង្គការសុខភាពពិភពលោក (WHO) ជាស្ថាប័នរបស់អង្គការសហប្រជាជាតិ (UN) ដែលប្រធានាធិបតី លោក Donald Trump បានបញ្ឈប់ការផ្តល់មូលនិធិ កំណត់អត្តសញ្ញាណការផ្ទុះឡើងនូវ​ជំងឺអេបូឡាយឺតពេល​។

នៅពេលត្រូវបាន​សួរដោយអ្នកសារ​ព័ត៌មានថា តើសហរដ្ឋអាមេរិកនឹងឆ្លើយតបទៅនឹងការផ្ទុះឡើងនូវ​វីរុសនេះយ៉ាងដូចម្តេច លោក Rubio បាននិយាយថា «ដោយ​ជាក់ស្តែង ចំណុចសំខាន់ គឺថា គួរ​ឲ្យសោក​​ស្ដាយ CDC (មជ្ឈមណ្ឌលគ្រប់គ្រង និងបង្ការជំងឺ) និងអង្គការសុខភាពពិភពលោក (WHO) កំណត់អត្តសញ្ញាណបញ្ហា​នេះយឺតពេល​បន្តិច​»។

​WHO ត្រូវបានបង្ខំកាត់បន្ថយប្រតិបត្តិការ​របស់ខ្លួន ដោយសារការបញ្ចប់ការផ្តល់មូលនិធិរបស់​សហរដ្ឋអាមេរិក ដែលជាអ្នករួមចំណែកសប្បុរសដ៏​ធំ​បំផុត ដោយ​មាន​ថវិកាជាង ១ពាន់លានដុល្លារ ដែលបានបែងចែកជារៀងរាល់ឆ្នាំក្រោមការ​ដឹក​នាំរបស់​លោក Joe Biden។

នៅពេលត្រូវបាន​សួរថា ហេតុអ្វីបានជាលោក Rubio ជឿថា WHO មាន​ភាព​យឺតយ៉ាវ ក្នុង​ការ​កំណត់​អត្តសញ្ញាណ​ជំងឺនេះ​ មន្ត្រីជាន់ខ្ពស់ម្នាក់ទៀតរបស់ក្រសួងការបរទេស ដែលបាន​និយាយក្នុងលក្ខខណ្ឌមិនបញ្ចេញឈ្មោះ បានប្រាប់​ថា ស្ថាប័នរបស់​ UN មួយ​នេះ ចំណាយ​ពេល ១០​ថ្ងៃ​ ដើម្បីបញ្ជាក់ពីការផ្ទុះឡើងនូវជំងឺអេបូឡា​។

គួរបញ្ជាក់ថា WHO កាលពីព្រឹកថ្ងៃទី១៩​ ខែឧសភា បានឲ្យ​ដឹង​ថា ខ្លួនមានក្ដី​បារម្ភ អំពី «ទំហំ និងល្បឿន» នៃការផ្ទុះឡើងនូវ​ជំងឺអេបូឡា ដែលអាជ្ញាធរសាធារណរដ្ឋប្រជាធិបតេយ្យកុងហ្គោ បញ្ជាក់​ថា បានបណ្តាលឲ្យ​មានមនុស្សស្លាប់ចំនួន ១៣៦​នាក់៕