សហរដ្ឋអាមេរិកនឹងធានាថា ក្រុមជម្រើស​ជាតិ​សាធារណរដ្ឋប្រជាធិបតេយ្យកុងហ្គោ (DRC) អាចចូលប្រទេសបាន​ ដើម្បីប្រកួត​បាល់​ទាត់ពិភពលោក​ (World Cup) ដោយលើកលែងបម្រាម​មិន​ឲ្យ​ចូលប្រទេស ទាក់ទងនឹងជំងឺអេបូឡា។​ នេះបើយោងតាមមន្ត្រីជាន់ខ្ពស់ក្រសួងការបរទេស។

មន្ត្រីរូបនេះ បាននិយាយក្នុងលក្ខខណ្ឌមិនបញ្ចេញឈ្មោះថា៖ «យើងរំពឹងថា ក្រុមបាល់​ទាត់​របស់​ជម្រើសចាតិកុងហ្គោ នឹងអាចចូលរួមព្រឹត្តិការណ៍ World Cup បាន»។

គួរបញ្ជាក់ថា សហរដ្ឋអាមេរិកបានហាមឃាត់ជនបរទេសដែលធ្លាប់ស្នាក់​នៅកុង​ហ្គោ អ៊ូហ្គង់ដា ឬស៊ូដង់ខាងត្បូង ក្នុងរយៈពេល ២១ថ្ងៃមុននេះ​ មិនឲ្យ​ចូល​មក​លេង​កម្សាន្ត​ប្រទេស ដោយសារតែការផ្ទុះឡើងនូវ​ជំងឺអេបូឡាដែល​បណ្ដាល​ឲ្យមាន​អ្នកស្លាប់​ច្រើន​។

មន្ត្រីអាមេរិករូបនេះបានបញ្ជាក់​ថា ក្រុមជម្រើស​ជាតិ​កុង​ហ្គោ​ ដែល​ជាក្រុមតែ ១គត់ ក្នុងចំណោមប្រទេសទាំង៣ ទទួលបាន​សិទ្ធិទៅ​ចូល​រួម​​ក្នុង​ព្រឹត្តិការណ៍បាល់ទាត់ដ៏​ធំ​របស់​ពិភពលោក​ បានហ្វឹកហាត់រួចហើយ នៅអឺរ៉ុប ដូច្នេះពួកគេប្រហែលជាមិនត្រូវបានហាមឃាត់ក្នុងករណីណាក៏ដោយ។

ប៉ុន្តែប្រសិនបើពួកគេពិតជាបានស្នាក់​នៅកុង​ហ្គោ​ ក្នុងរយៈពេល ២១ថ្ងៃកន្លង​មក​ ពួកគេនឹងត្រូវ​រងការត្រួតពិនិត្យយ៉ាងតឹងរ៉ឹងដែលត្រូវបាន​តម្រូវ សម្រាប់ពលរដ្ឋអាមេរិកដែលវិលត្រឡប់​ចូល​ប្រទេសវិញ​។

សាធារណរដ្ឋប្រជាធិបតេយ្យកុងហ្គោ ត្រូវ​ចាប់ផ្តើមយុទ្ធនាការ World Cup របស់ពួកគេ នៅរដ្ឋ Texas ដោយ​ត្រូវ​ប្រកួត​ទល់​នឹង​ក្រុម​ជម្រើស​ជាតិ​ព័រទុយហ្គាល់ នៅថ្ងៃទី១៧ ខែមិថុនា៕