យោងតាមច្បាប់ចម្លងដែលទីភ្នាក់​ងារ​សារព័ត៌មាន​ Reuters បាន​ឃើញ​ បានបង្ហាញ​ថា សមាជិកព្រឹទ្ធសភាអាមេរិកមកពីគណបក្សទាំង២ នឹងបង្ហាញសេចក្តីព្រាងច្បាប់ នៅថ្ងៃអង្គារ ដែលមានគោលបំណងប្រឆាំងនឹងការលក់ឧបករណ៍ AI (បញ្ញាសិប្បនិម្មិត) របស់ប្រទេស​ចិន នៅបរទេស​។

ច្បាប់នេះ ដែល​ណែនាំ​ដោយលោកស្រី Jeanne Shaheen មកពីគណបក្សប្រជាធិបតេយ្យ ប្រចាំ​រដ្ឋ New Hampshire និងលោក Pete Ricketts មកពីគណបក្សសាធារណរដ្ឋ ប្រចាំ​រដ្ឋ Nebraska នឹងបង្កើតការិយាល័យមួយ នៅក្នុងក្រសួងការបរទេស ដើម្បីជួយ​ឧបត្ថម្ភ​ដល់​ការទិញបច្ចេកវិទ្យារបស់រដ្ឋាភិបាលដែល​ជា​សម្ព័ន្ធមិត្តរបស់សហរដ្ឋអាមេរិក និងធ្វើ​ឲ្យ​ដំណើរការ​លទ្ធកម្ម​កាន់​តែ​មាន​ភាព​ងាយ​ស្រួលឡើងៗ។

ប្រសិនបើត្រូវបានអនុម័ត មូលនិធិដែលមានតម្លៃ ៥០០លានដុល្លារ នឹងត្រូវបានបង្កើតឡើង ដើម្បីជួយផ្តល់ហិរញ្ញប្បទានដល់កម្មវិធីនេះ។ សេចក្តីព្រាងច្បាប់នេះ ដែលសេចក្ដី​លម្អិតកំពុង​ត្រូវបាន​សារព័ត៌មាន​ Reuters រាយការណ៍ដំបូងគេ​ នឹងស្វែងរកការជំរុញគំនិតផ្តួចផ្តើម Pax Silica របស់រដ្ឋបាលលោក Donald Trump។

កិច្ចប្រឹងប្រែងនោះ មានគោលបំណងកាត់បន្ថយការពឹងផ្អែកលើប្រទេសចិន និងពង្រឹងកិច្ចសហប្រតិបត្តិការ ក្នុងចំណោមសម្ព័ន្ធមិត្ត ដោយធានានូវ​លទ្ធភាព​ចូលប្រើប្រាស់រ៉ែសំខាន់ៗ និងសមាសធាតុ​ខ្សែច្រវាក់ផ្គត់ផ្គង់ AI សំខាន់​ៗផ្សេងទៀត។ លោកស្រី Shaheen បានលើក​ឡើង​នៅក្នុងសេចក្តីថ្លែងការណ៍មួយថា៖ «ការប្រកួតប្រជែងរបស់យើងជាមួយប្រទេសចិន គឺផ្តោតលើសមត្ថភាពរបស់យើងក្នុងការអភិវឌ្ឍ និងលើកកម្ពស់បច្ចេកវិទ្យានាពេលអនាគតដល់ដៃគូរបស់យើង»។

ស្ថានទូតចិនប្រចាំទីក្រុងវ៉ាស៊ីនតោន មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ។ បើយោងតាមការស្រាវជ្រាវរបស់សាកលវិទ្យាល័យ Griffith របស់ប្រទេសអូស្ត្រាលី និងមជ្ឈមណ្ឌលហិរញ្ញវត្ថុ និងអភិវឌ្ឍន៍បៃតង នៅទីក្រុងសៀងហៃ បាន​ឲ្យ​ដឹង​ថា កិច្ចប្រឹងប្រែងផ្នែកនីតិបញ្ញត្តិនេះ ក៏កើតឡើងផងដែរ ខណៈដែលចិនបានបញ្ចេញ​ទឹក​ប្រាក់ចំនួន ២១៣ពាន់លានដុល្លារកាលពីឆ្នាំមុន សម្រាប់​គំនិតផ្តួចផ្តើមខ្សែក្រវាត់​ និងផ្លូវ ដែលជាកម្មវិធីហេដ្ឋារចនាសម្ព័ន្ធក្រៅប្រទេសដ៏ធំ​របស់ប្រទេស​នេះ​៕