ប្រធានាសភាជាតិវេណេស៊ុយអេឡាលោក Jorge Rodriguez និយាយថា អ្នកទោសនយោបាយ ៣០០នាក់ នឹងត្រូវដោះលែងចេញពីពន្ធនាគារ ក្នុងសប្តាហ៍នេះ ។

ក្រុមអ្នកទោសដែលនឹងត្រូវដោះលែងទាំងនេះ រួមមានមន្រ្តីនគរបាល ៣នាក់ ដែលបានជាប់ឃុំចាប់តាំងពីឆ្នាំ ២០០៣រហូតមក អ្នកទោសមានបញ្ហាសុខភាព និងអ្នកដែលមានវ័យលើសពី ៧០ឆ្នាំ ។

លោក Rodriguez ដែលត្រូវជាបងប្រុសលោកស្រីប្រធានាធិបតីស្តីទី Delcy Rodriguez ពុំបានបញ្ជាក់នោះទេថាតើ មនុស្សទាំង ៣០០នាក់នេះ ត្រូវបានដោះលែងជាផ្នែកមួយនៃច្បាប់លើកលែងទោសដែលត្រូវបានអនុម័តកាលពីខែកុម្ភៈ ឬយ៉ាងណានោះទេ ។

លោក Rodriguezនិយាយថា អ្នកទោសសរុប ៣០០នាក់ ចន្លោះថ្ងៃម្សិលមិញ និងថ្ងៃសុក្រខាងមុខ នឹងត្រូវដោះលែង ។

លោកបន្តថា អ្នកទោសទាំងអស់នោះ ត្រូវបានកាត់ទោសពីបទឧក្រិដ្ឋ ប៉ុន្តែដោយសារពួកគេគឺជាអានីតិជន មនុស្សចាស់វ័យលើសពី ៧០ឆ្នាំ ឬអ្នកដែលមានបញ្ហាសុខភាព ធ្វើឲ្យពួកគេត្រូវបានដោះលែងបែបនេះ ។

រដ្ឋាភិបាលវេណេស៊ុយអេឡា តែងតែច្រានចោលការឃុំឃាំងអ្នកទោសនយោបាយ ហើយពួកគេនិយាយថា អ្នកដែលត្រូវបានកាត់ទោសឲ្យជាប់ពន្ធនាគារ បានប្រព្រឹត្តឧក្រិដ្ឋកម្ម ៕