ក្រុមអាជ្ញាធរនិយាយថា ទាហានស៊ីរីម្នាក់ ត្រូវបានសម្លាប់ និងមនុស្សយ៉ាងហោច ២១នាក់ផ្សេងទៀត រងរបួសក្នុងហេតុការណ៍ផ្ទុះរថយន្តបង្កប់គ្រាប់បែកនៅក្រៅអគារក្រសួងការពារជាតិ ស្ថិតក្នុងទីក្រុងដាម៉ាស ។

ក្រសួងការពារជាតិស៊ីរីនិយាយនៅក្នុងសេចក្តីថ្លែងការណ៍ចុះផ្សាយដោយសារព័ត៌មានរដ្ឋថា រថយន្តបង្កប់គ្រាប់បែក បានផ្ទុះឡើង ពេលដែលទាហានព្យាយាមកម្ទេចគ្រាប់បែកដែលរកឃើញនៅក្បែរនោះ ស្ថិតក្នុងស្រុក Bab Sharqi ។

លោក Najib al-Nassan គឺជាប្រធាននាយកដ្ឋានសង្គ្រោះបន្ទាន់ និងរថយន្តគិលានសង្គ្រោះស៊ីរី និយាយប្រាប់ទីភ្នាក់ងារព័ត៌មានរដ្ឋ SANA ថា មនុស្សរងរបួស ២១នាក់ ត្រូវបានបញ្ជូនទៅកាន់មន្ទីរពេទ្យ ក្រោយហេតុការណ៍ផ្ទុះរថយន្តបង្កប់គ្រាប់បែក ។

នៅពុំទាន់មានក្រុមណាមួយប្រកាសទទួលស្គាល់ភ្លាមៗនោះទេ ចំពោះការវាយប្រហារលើកនេះ ។

សូមបញ្ជាក់ថា ឧបទ្ទេវហេតុសន្តិសុខ រួមទំាងការផ្ទុះគ្រាប់បែកមានគោលដៅលើរថយន្តយោធា និងរថយន្តស៊ីវិល បានកើតឡើងជារឿយៗ នៅក្នុងប្រទេសស៊ីរី ចាប់តាំងពីការការដួលរលំនៃរបបរបស់លោកប្រធានាធិបតី Bashar al-Assad កាលពីចុងឆ្នាំ ២០២៤ ក្រោយសង្រ្គាមស៊ីវិលរយៈពេលជាង ១៣ឆ្នាំ ៕