ប្រទេស​រុស្ស៊ី និងចិន នៅ​ថ្ងៃពុធ (ទី​២០ ខែឧសភា ឆ្នាំ២០២៦) នេះ បាន​លើកឡើង​ថា ផែនការខែលការពារមីស៊ីល Golden Dome របស់ប្រធានាធិបតីអាមេរិក លោក Donald Trump បានគំរាមកំហែងដល់ស្ថិរភាពជាយុទ្ធសាស្ត្រ ហើយថា ទីក្រុងវ៉ាស៊ីនតោន មិនបានទទួលខុសត្រូវ ដោយ​មិន​ធ្វើការ ស្ដី​ពីកិច្ច​ព្រម​ព្រៀង​​​ជំនួសសន្ធិសញ្ញានុយក្លេអ៊ែរដ៏​សំខាន់​​។

ការរិះគន់​នេះត្រូវបានចេញនៅក្នុងសេចក្តីថ្លែងការណ៍រួមមួយ បន្ទាប់ពីប្រធានាធិបតីចិន​ លោក​ ស៊ី ជីនពីង (Xi Jinping) បានស្វាគមន៍សមភាគី​របស់លោក​ គឺលោក​ Vladimir Putin ជាមួយនឹងកងឆ្មាំ​កិត្តិយស និងការបាញ់កាំភ្លើងគំនាប់ នៅឯមហា​សាលប្រជាជនចិន ក្នុង​ទីក្រុងប៉េកាំង ខណៈក្មេងៗ បានគ្រវីទង់ជាតិចិន និងរុស្ស៊ី។

ប្រព័ន្ធ​ការពារ​មីស៊ីល Golden Dome មាន​គម្រោង​ពង្រឹង​ដល់​ការពង្រីកការការពារដែលមានមូលដ្ឋានលើដី ដូចជាមីស៊ីលស្ទាក់ចាប់ ឧបករណ៍ចាប់សញ្ញា ហើយ​និងប្រព័ន្ធបញ្ជា និងត្រួតពិនិត្យ ខណៈពេលដែលបន្ថែមប្រព័ន្ធ​មានមូលដ្ឋានក្នុង​លំហ ដែលមានន័យថា ​រកឃើញ​​ តាមដាន និងបាញ់ទម្លាក់ការគំរាមកំហែងដែលចូល​មក​ពី​គន្លងតារាវិថី​។ ទាំងនេះនឹងរួមបញ្ចូលបណ្តាញផ្កាយរណបទំនើប និងអាវុធក្នុង​គន្លងតារាវិថី។

ប្រទេសទាំង២ បាន​សង្កត់ធ្ងន់ថា៖ «ភាគីនានាជឿជាក់ថា គម្រោង Golden Dome របស់សហរដ្ឋអាមេរិក ដែលមានគោលបំណងសាងសង់ប្រព័ន្ធការពារមីស៊ីលគ្មានដែនកំណត់ ពហុកម្រិត ពហុវិស័យ និងសកល ដើម្បីបំផ្លាញមីស៊ីលគ្រប់ប្រភេទ រួមទាំងមីស៊ីលគូប្រជែង គ្រប់ប្រភេទ នៅគ្រប់ដំណាក់កាលនៃការហោះហើររបស់មីស៊ីល​ទាំង​នោះ​ និងមុនពេលពួកវាត្រូវបានបាញ់បង្ហោះ បង្កការគំរាមកំហែងជាក់ស្តែងដល់ស្ថិរភាពជាយុទ្ធសាស្ត្រ»។

ជាមួយ​គ្នានេះ ចិន និង​រុស្ស៊ី បាន​បន្ថែមទៀត​​ថា៖ «ផែនការទាំងនេះផ្ទុយទាំងស្រុងពីគោលការណ៍សំខាន់នៃការរក្សាស្ថិរភាពជាយុទ្ធសាស្ត្រ ដែលតម្រូវឲ្យ​មានការតភ្ជាប់គ្នាទៅវិញទៅមកនូវ​អាវុធវាយលុកជាយុទ្ធសាស្ត្រ និងអាវុធការពារជាយុទ្ធសាស្ត្រ»។

ជាង​នេះ​ទៀត​ ប្រទេស​ទាំង២ ក៏បានលើក​ឡើង​ផងដែរថា ពួកគេសោកស្តាយចំពោះ «គោលនយោបាយមិនទទួលខុសត្រូវ» របស់សហរដ្ឋអាមេរិក ដែលបានបណ្ដោយ​ឲ្យ​សន្ធិសញ្ញាគ្រប់គ្រងអាវុធ New START ឆ្នាំ២០១០ ផុតកំណត់ដោយគ្មានកិច្ចព្រម​ព្រៀង​ជំនួស នៅដើមឆ្នាំនេះ៕