ឆ្មាំបដិវត្តន៍អ៊ីរ៉ង់ បានព្រមាននៅថ្ងៃពុធ (ទី២០ ខែឧសភា ឆ្នាំ២០២៦) នេះ​ថា សង្គ្រាមមជ្ឈិមបូព៌ា នឹងរីករាលដាលហួសពីតំបន់នេះ​ ប្រសិនបើសហរដ្ឋអាមេរិក និងអ៊ីស្រាអែល ចាប់ផ្ដើម​ការវាយប្រហារឡើង​វិញ លើសាធារណរដ្ឋឥ​ស្លាម។

ក្នុងសេចក្តីថ្លែងការណ៍មួយ នៅលើគេហទំព័រព័ត៌មាន​ Sepah News របស់ខ្លួន​ កង​ឆ្មាំបានបញ្ជាក់​ថា៖ «ប្រសិនបើការឈ្លានពាន លើអ៊ីរ៉ង់ ត្រូវបានធ្វើឡើង​ម្តងទៀត សង្គ្រាមក្នុងតំបន់ដែលត្រូវ​បានសន្យាលើកនេះ នឹងរីករាលដាលហួសពីតំបន់នេះ​ ហើយការវាយប្រហារដ៏សាហាវរបស់យើង នឹងកម្ទេច​អ្នក»។

ការព្រមាននេះកើតឡើងបន្ទាប់ពីប្រធានាធិបតីអាមេរិក លោក​ Donald Trump បាននិយាយថា ទីក្រុងវ៉ាស៊ីនតោន អាចវាយប្រហារអ៊ីរ៉ង់ម្តងទៀត ប្រសិនបើកិច្ចព្រមព្រៀង ស្ដី​ពី​ដំណោះស្រាយយូរអង្វែងណាមួយ មិន​ត្រូវបានឈានដល់ក្នុងរយៈពេលប៉ុន្មានថ្ងៃខាងមុខនេះ​ទេ។

ភាគីទាំង២ បានបង្កើនការគំរាមកំហែងដាក់​គ្នា​ទៅវិញ​ទៅមក​ ខណៈពេលដែលកំពុងផ្លាស់ប្តូរសំណើ ដើម្បីបញ្ចប់សង្គ្រាម ដែលបានផ្ទុះឡើងកាល​ពី​ថ្ងៃទី២៨​ ខែកុម្ភៈ។ បទឈប់បាញ់មួយ ត្រូវបានអនុវត្តចាប់តាំងពីថ្ងៃទី៨ ខែមេសា។

កង​ឆ្មាំរបស់​ទីក្រុង​តេអេរ៉ង់​បានបញ្ជាក់ថា៖ «សត្រូវ គឺអាមេរិក និង​ក្រុម​គាំទ្រលទ្ធិហ្សាអឺន (អ៊ីស្រាអែល) ត្រូវតែដឹងថា ទោះបីជាមានការវាយលុកដែលបានធ្វើឡើងប្រឆាំងនឹងយើង ដោយប្រើសមត្ថភាពពេញលេញនៃកងទ័ពមាន​តម្លៃ​ថ្លៃបំផុតទាំង២ របស់ពិភពលោកក៏ដោយ ក៏​យើងមិនទាន់បានដាក់ពង្រាយកម្លាំងទាំង​ស្រុង​របស់​កង​ឆ្មាំ​បដិវត្តន៍ឥ​ស្លាមនៅឡើយទេ»។

គួរ​បញ្ជាក់ថា សង្គ្រាមមាន​រយៈពេល​ជិត ៤០ថ្ងៃ បានសម្លាប់មេដឹកនាំធំ​ៗជាច្រើន​រូបរបស់​អ៊ីរ៉ង់​ ក្នុង​នោះ​រួមមាន​ទាំងមេដឹកនាំកំពូល លោក​ Ayatollah Ali Khamenei ផង​ដែរ​ ដែលបង្កឲ្យ​មានការវាយប្រហារសង​សឹក​ដោយទីក្រុងតេអេរ៉ង់នៅទូទាំងតំបន់ ដោយប្រើប្រាស់​មីស៊ីល និងយានដ្រូន​៕