សភាអ៊ីស្រាអែល Knesset បានអនុម័តសេចក្តីព្រាងច្បាប់ សម្រាប់ការរំលាយសភា អំឡុង​ដំណាក់​កាល​ដំបូង នៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ​ ដោយមានការគាំទ្រ ទាំង​ពីសមាជិកសភារដ្ឋាភិបាល​ចម្រុះ និងគណបក្សប្រឆាំង។

ប្រធានសភា Knesset លោក Amir Ohana បាននិយាយថា សមាជិកសភាចំនួន ១១០នាក់ បានបោះឆ្នោតគាំទ្រសំណើនេះ ខណៈដែលគ្មានសមាជិកណាម្នាក់ ជំទាស់នឹងសំណើនេះទេ។​ នេះបើយោងតាមបណ្តាញផ្លូវការរបស់សភា Knesset។

ការបោះឆ្នោតនេះ គឺជាដំណាក់កាលដំបូងនៃដំណើរការនីតិបញ្ញត្តិ ដើម្បីរំលាយសភា Knesset និងអាចបើកផ្លូវឲ្យ​មាន​ការបោះឆ្នោតមុនអាណត្តិ​។

 យោងតាមសារព័ត៌មាន​ចុះ​ផ្សាយ​ប្រចាំថ្ងៃ Yedioth Ahronoth បាន​ឲ្យ​ដឹង​ថា នាយករដ្ឋមន្ត្រី លោក Benjamin Netanyahu មិនបានចូលរួមនោះទេ នៅក្នុង​ការបោះឆ្នោតបឋម អំឡុង​កិច្ចប្រជុំពេញអង្គរបស់សភា Knesset ដោយសារតែលោកកំពុងរៀបចំកិច្ចប្រជុំសន្តិសុខ។ សេចក្តីព្រាងច្បាប់រំលាយសភានេះ នឹងនៅតែត្រូវការការដំណាក់​បន្ថែមផ្សេង​ទៀត​ មុនពេលក្លាយជាច្បាប់ជា​ធរមាន​៕