នាថ្ងៃពុធ (ទី២០ ខែឧសភា ឆ្នាំ២០២៦) នេះ រដ្ឋមន្ត្រីការបរទេស លោក Ishaq Dar បានប្រកាសឲ្យ​ដឹង​ថា នាយករដ្ឋមន្ត្រីប៉ាគីស្ថាន លោក Shehbaz Sharif នឹងបំពេញទស្សនកិច្ចផ្លូវរដ្ឋទៅកាន់ប្រទេសចិន នៅថ្ងៃទី ២៣-២៦ ខែឧសភា។

អំឡុង​ពេល​ថ្លែងទៅកាន់សម័យប្រជុំព្រឹទ្ធសភា លោក Dar ដែលជាឧបនាយករដ្ឋមន្ត្រី​ដែរនេះ​ បាននិយាយថា លោកនឹងអមដំណើរលោក Sharif ក្នុងអំឡុងពេលទស្សនកិច្ចនេះ។

យោងតាមសម្ដីរបស់​លោក បាន​ឲ្យ​ដឹង​ថា នាយករដ្ឋមន្ត្រីប៉ាគីស្ថាន នឹងមាន​កិច្ចប្រជុំជាមួយថ្នាក់​ដឹកនាំចិន ក្នុង​នោះ​រួមមាន​ទាំងលោក​ប្រធានាធិបតី Xi Jinping និងលោក​នាយករដ្ឋមន្ត្រី Li Qiang ផង​ដែរ។ ជាមួយគ្នានេះ លោក Sharif ក៏ត្រូវបានគេរំពឹងថា នឹងចូលរួមកិច្ចប្រជុំអាជីវកម្ម និងមាន​វត្តមាន​ក្នុងព្រឹត្តិការណ៍ដែលប្រារព្ធខួបលើកទី៧៥ នៃទំនាក់ទំនងការទូត រវាងប៉ាគីស្ថាន និងចិន។

លោក Dar បានបញ្ជាក់​ថា៖ «យើងក៏នឹងមានកិច្ចប្រជុំនៃយន្តការសំខាន់ចំនួន​ ២ ផងដែរ ដោយ​ទី១​វេទិកានយោបាយប៉ាគីស្ថាន-ចិន និងទី២ យន្តការពិគ្រោះយោបល់រួមគ្នា CPEC (ច្រករបៀងសេដ្ឋកិច្ចចិន-ប៉ាគីស្ថាន)»។ ហើយ​លោក​បាន​បន្ថែមថា គណៈប្រតិភូសភាពហុបក្សដ៏ធំមួយ ទៅ​ពីប៉ាគីស្ថាន នឹងចូលរួមក្នុងកិច្ចប្រជុំជាច្រើន នៅទីក្រុងប៉េកាំង។

យ៉ាង​ណាក្ដី​ ទីក្រុងប៉េកាំងមិនទាន់បានបញ្ជាក់ជាផ្លូវការ អំពីដំណើរទស្សនកិច្ចនេះនៅឡើយទេ៕