តុលាការជាន់ខ្ពស់អ៊ីស្រាអែល បានបដិសេធញត្តិដាក់ដោយអង្គការជំនួយអន្តរជាតិ ដែលកំពុងមាន​ប្រតិបត្តិការ នៅដែន​ដី​ប៉ាឡេស្ទីន ហើយបានផ្តល់រយៈ​ពេល ១ខែ ឲ្យ​ក្រុម​ទាំង​នោះដាក់បញ្ជីឈ្មោះបុគ្គលិកទៅរដ្ឋាភិបាល ឬបើ​មិន​ដូច្នោះទេ ត្រូវ​ប្រឈម​នឹង​ការ​បញ្ឈប់ប្រតិបត្តិការ។ នេះបើយោងតាមសេចក្តីថ្លែងការណ៍របស់រដ្ឋាភិបាលអ៊ីស្រាអែល នៅថ្ងៃពុធ (ទី២០ ខែឧសភា ឆ្នាំ២០២៦) នេះ​។

រដ្ឋាភិបាលបានឲ្យ​ដឹង​ថា ញត្តិនេះត្រូវបានដាក់ដោយ AIDA ជាក្រុមឆ័ត្រមួយដែលតំណាងឲ្យ​អង្គការជំនួយមិនមែនរដ្ឋាភិបាលអន្តរជាតិចំនួន ១៩​ ដែលធ្វើការនៅក្នុងតំបន់ហ្កាហ្សា និងតំបន់កាន់កាប់ West Bank។

យោងតាមសេចក្តីថ្លែងការណ៍នោះ បាន​ឲ្យ​ដឹង​ទៀត​ថា ញត្តិនេះបានកើតឡើង បន្ទាប់ពីអង្គការទាំងនោះបានបដិសេធមិនផ្តល់បញ្ជីឈ្មោះបុគ្គលិកមូលដ្ឋាន​របស់ពួកគេដល់អ៊ីស្រាអែល «តាមការ​តម្រូវ ក្រោមនីតិវិធីចុះបញ្ជីអង្គការមិនមែនរដ្ឋាភិបាល និងការត្រួតពិនិត្យសន្តិសុខ»។

គួរបញ្ជាក់​ថា ក្រុមជំនួយអន្តរជាតិរាប់សិបបានប្រឆាំងនឹងការ​តម្រូវថ្មីរបស់អ៊ីស្រាអែល ដែលរួមមានការដាក់ឈ្មោះបុគ្គលិកមូល​ដ្ឋាន​ ការកំណត់អត្តសញ្ញាណអ្នកទទួលផលជំនួយ និងការចៀសវាងការរិះគន់អ៊ីស្រាអែល ជាលក្ខខណ្ឌសម្រាប់ការបន្តប្រតិបត្តិការ នៅក្នុងតំបន់កាន់កាប់ West Bank និងតំបន់ហ្កាហ្សា​៕