ទួរ​គីបានឲ្យ​ដឹង​នៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ​ថា អាល្លឺម៉ង់នឹងបញ្ជូនប្រព័ន្ធការពារមីស៊ីល Patriot ទៅកាន់ប្រទេសនេះ សម្រាប់ការដាក់ពង្រាយរយៈពេល ៦ខែ ចាប់ពីខែមិថុនា ដើម្បីជំនួសប្រព័ន្ធដែល​ត្រូវ​ដាក់ពង្រាយ ជាផ្នែកមួយនៃវិធានការរបស់អង្គការ​ណាតូ (NATO) នៅភាគអាគ្នេយ៍នៃ​ប្រទេសទួរគី ដើម្បីជំរុញការការពារដែនអាកាស ក្នុងអំឡុងពេលមាន​សង្គ្រាម នៅអ៊ីរ៉ង់។

កាលពីខែមីនា ទីក្រុង​ Ankara បាននិយាយថា ប្រព័ន្ធ Patriot របស់សហរដ្ឋអាមេរិក ត្រូវបានដាក់ពង្រាយទៅកាន់ភាគអាគ្នេយ៍ទួរគី នៅជិតមូលដ្ឋានរ៉ាដារបស់អង្គការ​ណាតូ ដើម្បី​ទប់​ទល់​នឹង​ការគំរាមកំហែងដោយ​មីស៊ីល ពីអ៊ីរ៉ង់​។ ប្រព័ន្ធ​ការពាររបស់អង្គការ​ណាតូ បានបាញ់ទម្លាក់មីស៊ីលបាលីស្ទិក​ចំនួន ៤គ្រាប់ដែលបាញ់ចេញពីអ៊ីរ៉ង់ អំឡុងសង្គ្រាម។

ក្រសួងការពារជាតិទួរគីបានឲ្យ​ដឹង​នៅក្នុងសេចក្តីថ្លែងការណ៍មួយថា៖ «បន្ថែមពីលើប្រព័ន្ធការពារដែនអាកាស Patriot របស់អេស្ប៉ាញ ដែលកំពុងត្រូវបាន​ដាក់ពង្រាយនៅក្នុងប្រទេសរបស់យើង ប្រព័ន្ធ Patriot មួយ ក្នុងចំណោមប្រព័ន្ធបន្ថែមចំនួន ២ ដែលដាក់ពង្រាយដោយអង្គការ​ណាតូ ដោយសារតែជម្លោះ រវាងសហរដ្ឋអាមេរិក-អ៊ីស្រាអែល និងអ៊ីរ៉ង់ នឹងត្រូវជំនួសដោយប្រព័ន្ធរបស់អាល្លឺម៉ង់»។

ក្រសួងការពារជាតិទួរគីបានបញ្ជាក់​ថា៖ «ការដាក់​ជំនួសនេះ ត្រូវបានគ្រោងនឹងបញ្ចប់នៅក្នុងខែមិថុនា ហើយប្រព័ន្ធនេះត្រូវបានគេរំពឹងថា នឹងនៅតែដំណើរការប្រហែល ៦ខែ»។ ក្រសួង​បាន​បន្ថែមថា ការវាយតម្លៃសន្តិសុខ នឹងបន្តសម្របសម្រួលជាមួយសម្ព័ន្ធមិត្ត។

គួរ​បញ្ជាក់​ថា ទួរគី​ដែលមានកងទ័ពធំទី២ របស់អង្គការ​ណាតូ ក្នុងប៉ុន្មានឆ្នាំថ្មីៗនេះ បានចាត់វិធានការសំខាន់ៗ ដើម្បីកាត់បន្ថយការពឹងផ្អែករបស់ខ្លួន លើអ្នកផ្គត់ផ្គង់ខាងក្រៅ នៅក្នុងឧស្សាហកម្មការពារជាតិ។ តែ​បើទោះបីជាមានការខិតខំប្រឹងប្រែងយ៉ាង​នេះ​ក៏ដោយ ក៏វានៅតែខ្វះប្រព័ន្ធការពារដែនអាកាសដ៏ទូលំទូលាយ ហើយពឹងផ្អែកលើប្រព័ន្ធរបស់​អង្គការ​ណាតូដែលដាក់ពង្រាយនៅក្នុងតំបន់ ដើម្បី​ជួយ​គាំទ្រ៕