រដ្ឋមន្ត្រីក្រសួងការពារជាតិប៉ូឡូញ បាននិយាយថា មិនមានការសម្រេចចិត្តណាមួយត្រូវបានធ្វើឡើងឡើយ​ ក្នុង​ការ​កាត់បន្ថយចំនួនកងទ័ពអាមេរិក នៅក្នុងប្រទេសនេះ​ ហើយ​ចំណាត់ការ​ថ្មីៗរបស់សហរដ្ឋអាមេរិក អាចនឹង​ត្រូវ​បាន​ពន្យារពេលការដាក់ពង្រាយជាបណ្តោះអាសន្ន បន្ទាប់ពីបានជួបជាមួយអនុប្រធានអគ្គ​​សេនាធិការចម្រុះសហរដ្ឋអាមេរិក លោក Christopher Mahoney។

កាលពីថ្ងៃអង្គារ (ទី១៩ ខែឧសភា ឆ្នាំ២០២៦) អនុប្រធានាធិបតី លោក JD Vance បានប្រាប់អ្នកសារ​ព័ត៌មានថា ការដាក់ពង្រាយកងទ័ពអាមេរិកទៅកាន់ប្រទេសប៉ូឡូញត្រូវបានពន្យារពេល ប៉ុន្តែវាមិនត្រឹមត្រូវនោះ​ទេ ដែល​និយាយថា កងទ័ពកំពុងត្រូវបានដកចេញពីអឺរ៉ុប។

ប៉ូឡូញមានក្ដី​បារម្ភ​នៅ​មុននេះ​ដោយរបាយការណ៍ ដែល​ថា មន្ទីរបញ្ចកោណបានលុបចោលផែនការដាក់ពង្រាយកងទ័ពអាមេរិកចំនួន ៤.០០០នាក់ នៅក្នុងប្រទេស។ មន្ត្រីបានព្យាយាមធានាដល់ប្រជាជនប៉ូឡូញថា ករណីនេះ​មិន​កើត​ឡើង​នោះ​ទេ។

បន្ទាប់ពីជួបជាមួយលោក Mahoney លោក Wladyslaw Kosiniak-Kamysz បានប្រាប់អ្នកសារព័ត៌មានថា៖ «ការសម្រេចចិត្តដែលត្រូវបានធ្វើឡើង នៅសហរដ្ឋអាមេរិក និងផលវិបាករបស់វា អាចនឹង​ពន្យារពេលការដាក់ពង្រាយកងកម្លាំងអាមេរិកជាបណ្តោះអាសន្ន នៅប្រទេសប៉ូឡូញ ជាអ្វីដែលយើងបាននិយាយថាមិនមានការសម្រេចចិត្តកាត់បន្ថយ​កង​កម្លាំង​ទេ មានតែការផ្អាកជាបណ្តោះអាសន្នប៉ុណ្ណោះ»។

គួរ​បញ្ជាក់​ថា កាលពីដើមខែនេះ មន្ទីរបញ្ចកោណបានឲ្យ​ដឹង​ថា ខ្លួននឹងដកកងទ័ពចំនួន ៥.០០០នាក់ចេញពីប្រទេសអាល្លឺម៉ង់ ដែលជាសម្ព័ន្ធមិត្តនៅក្នុង​អង្គការ​ណាតូ (NATO) ដោយ​ការ​ប្រកាស​នេះកើត​ឡើង​ដោយ​សារ​​ការបែកបាក់កាន់តែធំឡើង រវាងប្រធានាធិបតីអាមេរិក Donald Trump និងអឺរ៉ុប ដែលជាប់ទាក់ទងនឹងជម្លោះអ៊ីរ៉ង់​៕