នៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ យោធាមីយ៉ាន់ម៉ាបានអះអាងថា ដណ្តើម​កាន់​កាប់​បាន​វិញនូវ​ទីក្រុងមួយ នៅជាប់​ព្រំដែនថៃ ដែលខ្លួនអះអាងថា បាន​គ្រប់គ្រង ក្នុងអំឡុង​សង្គ្រាមស៊ីវិលអូស​បន្លាយ​ពេល​នេះ​។

យោងតាមស្ថិតិផ្លូវការរបស់មីយ៉ាន់ម៉ា បាន​ឲ្យ​ដឹង​ថា ទីក្រុង Mawtaung នៅ​ភាគខាងត្បូងនៃព្រំដែនរបស់​សហភាព​មីយ៉ាន់ម៉ា គឺជាប៉ុស្តិ៍ពាណិជ្ជកម្មតូចមួយ។ ប៉ុន្តែការដណ្តើមយកទីក្រុងនេះ នឹងតំណាងឲ្យ​ការជំរុញមួយផ្សេងទៀត សម្រាប់យោធា ដោយបន្ថែមទៅលើជ័យជម្នះជាបន្តបន្ទាប់ថ្មីៗនេះ ប្រឆាំងនឹងកងទ័ពជនជាតិភាគតិច និងក្រុមឧទ្ទាមគាំទ្រលទ្ធិប្រជាធិបតេយ្យ ដែលខ្លួនបានធ្វើសង្គ្រាមជាមួយចាប់តាំងពីការធ្វើរដ្ឋប្រហារឆ្នាំ២០២១។

ប្រព័ន្ធផ្សព្វផ្សាយរដ្ឋមីយ៉ាន់ម៉ា បានឲ្យ​ដឹង​ថា យោធាបានបាត់បង់ការគ្រប់គ្រងទីក្រុង Mawtaung ក្នុងតំបន់ Tanintharyi កាល​ពី​ខែវិច្ឆិកាឆ្នាំ​មុន​ ប៉ុន្តែដណ្តើមកាន់​កាប់​បានវិញកាល​ពី​ថ្ងៃទី១៩ ខែឧសភា បន្ទាប់ពីមាន​ការវាយបកវិញរយៈពេល ២សប្តាហ៍។

បើយោងតាមសារព័ត The Global New Light of Myanmar បាន​ឲ្យ​ដឹង​ថា សមរភូមិនេះ រួមមាន «ការប៉ះទង្គិចគ្នាទាំង​តូច និងធំ» ជាង ២០០លើក​ ដែលបានសម្លាប់យុទ្ធជនប្រឆាំងយ៉ាងហោចណាស់ ២៤នាក់ ។ ដោយមិនបានបញ្ជាក់ពី​ចំនួនអ្នកស្លាប់ សារព័ត៌មាន​នេះ បាន​បន្ថែម​ថា សមាជិកយោធាមួយចំនួន «ក៏បានពលី​ជីវិតរបស់ពួកគេផងដែរ»។

គួរបញ្ជាក់ាថា សង្គ្រាមស៊ីវិលបានគ្រប​លើ​សហ​ភាព​មីយ៉ាន់ម៉ា ចាប់តាំងពីមាន​រដ្ឋប្រហារយោធាកាលពី ៥ឆ្នាំមុន ដែលបានផ្តួលរំលំរដ្ឋាភិបាលជាប់ឆ្នោតរបស់លោកស្រី Aung San Suu Kyi ជា​ការ​​បញ្ចប់ការពិសោធន៍លទ្ធិប្រជាធិបតេយ្យរយៈពេល ១ទសវត្សរ៍៕