មនុស្សយ៉ាងតិច ៧នាក់បានបាត់បង់ជីវិត និង ២នាក់ផ្សេងទៀតរងរបួស អំឡុងការវាយប្រហារថ្មីរបស់អ៊ីស្រាអែល នៅភាគខាងត្បូងនៃប្រទេសលីបង់ នៅថ្ងៃពុធ (ទី២០ ខែឧសភា ឆ្នាំ២០២៦) នេះ ជាការរំលោភចុងក្រោយបំផុតលើកិច្ចព្រមព្រៀងបទឈប់បាញ់ដែលកំពុងដំណើរការ។ នេះបើយោងតាមប្រព័ន្ធផ្សព្វផ្សាយលីបង់។

ទីភ្នាក់ងារសារព័ត៌មានរដ្ឋ NNA បានរាយការណ៍ថា យន្តហោះចម្បាំង បានវាយប្រហារសង្កាត់ al-Baraka ក្នុងទីក្រុង Doueir ដោយសម្លាប់មនុស្សយ៉ាងតិច ៥នាក់ និងបណ្ដាលឲ្យរបួស ២នាក់ផ្សេងទៀត។ ទីភ្នាក់ងារនេះ បានឲ្យដឹងទៀតថា ផ្ទះជាច្រើនខ្នងត្រូវបានបំផ្លាញដោយសារការវាយប្រហារនេះ។

សារព័ត៌មានដដែលបានបន្ថែមថា ការវាយប្រហាររបស់អ៊ីស្រាអែលមួយផ្សេងទៀត បានសម្លាប់មនុស្ស ២នាក់ទៀត នៅជិតមន្ទីរពេទ្យមួយកន្លែង នៅក្នុងទីក្រុង Tebnine។ រលកនៃការវាយប្រហារថ្មីនេះ បានកើតឡើងប៉ុន្មានម៉ោងបន្ទាប់ពីមនុស្សយ៉ាងហោចណាស់ ១៦នាក់ត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែលនៅទូទាំងភាគខាងត្បូងលីបង់ កាលពីថ្ងៃអង្គារ។

ក្រសួងសុខាភិបាលបានឲ្យដឹងថា ស្ត្រី ៣នាក់ និងកុមារ ៣នាក់ ស្ថិតក្នុងចំណោមជនរងគ្រោះទាំងនោះ។ ការវាយប្រហាររបស់អ៊ីស្រាអែល នៅទូទាំងលីបង់ នៅតែបន្តមាន ទោះបីជាបទឈប់បាញ់សម្របសម្រួលដោយសហរដ្ឋអាមេរិក ត្រូវបានប្រកាសនៅថ្ងៃទី១៧ ខែមេសា ហើយក្រោយមក បានពង្រីករហូតដល់ដើមខែកក្កដាក៏ដោយ៕