​

អ្នកនាំពាក្យគណៈកម្មការអឺរ៉ុប នៅ​ថ្ងៃពុធ (ទី២០ ខែឧសភា ឆ្នាំ២០២៦) នេះ បានឲ្យ​ដឹង​ថា ហានិភ័យនៃការឆ្លងវីរុស Ebola នៅសហភាពអឺរ៉ុប (EU) នៅតែមាន​«កម្រិត​ទាបណាស់» ដដែល​ សូម្បីតែចំពោះ​អ្នកធ្វើដំណើរទៅកាន់តំបន់ដែលរងផលប៉ះពាល់នៅតំបន់​អាហ្វ្រិកក៏ដោយ ខណៈដែលមន្ត្រីសុខាភិបាលបន្តតាមដានស្ថានការណ៍យ៉ាងដិតដល់។

អំឡុង​ពេល​ថ្លែងនៅក្នុងសន្និសីទសារព័ត៌មានថ្ងៃត្រង់របស់គណៈកម្មការ EU នៅទីក្រុងប្រ៊ុចសែល​សែល (ប្រទេស​បែលហ្ស៊ិក) អ្នកនាំពាក្យ លោកស្រី Eva Hrncirova បាននិយាយថា EU កំពុងតាមដានយ៉ាងដិតដល់ចំពោះសភាព​ការណ៍​វិវត្តន៍​នានា ហើយត្រៀមខ្លួនឆ្លើយតបយ៉ាងឆាប់រហ័ស ប្រសិនបើចាំបាច់។

លោកស្រី Hrncirova បានបន្ត​ថា៖ «នៅពេលនេះ យោងតាមមជ្ឈមណ្ឌលបង្ការ និងគ្រប់គ្រងជំងឺអឺរ៉ុប (ECDC) បាន​ឲ្យ​ដឹង​ថា ហានិភ័យនៃការឆ្លងវីរុស នៅទីនេះ ក្នុង EU គឺ​មាន​កម្រិត​ទាបណាស់ សូម្បីចំពោះ​អ្នកដែលធ្វើដំណើរទៅកាន់តំបន់នោះ​ក៏ដោយ»។

លោកស្រីបានប្រាប់​ថា បច្ចុប្បន្ន «មិនមានការចង្អុលបង្ហាញ» ដែលថា ប្រជាជននៅអឺរ៉ុបត្រូវចាត់វិធានការលើសពីការណែនាំសុខភាពសាធារណៈធម្មតានោះទេ។ លោកស្រី Hrncirova បានបន្ថែមថា គណៈកម្មាធិការសន្តិសុខសុខភាពរបស់ EU កំពុងជួបប្រជុំគ្នានៅថ្ងៃពុធនេះ​ ដើម្បីវាយតម្លៃស្ថានភាព និងពិភាក្សាថា តើវិធានការបន្ថែម នៅអឺរ៉ុប មានភាព​ចាំបាច់ដែរ​ ឬយ៉ាង​ណា​។

គួរបញ្ជាក់​ថា បើយោងតាមតួលេខចុងក្រោយបំផុតពីអង្គការសុខភាពពិភពលោក (WHO) បាន​ឲ្យ​ដឹង​ថា គិតត្រឹមថ្ងៃទី២០ ខែឧសភានេះ​ មានករណីសង្ស័យជិត ៦០០ករណី ក្នុង​នោះ​រួមទាំងការស្លាប់ដែលសង្ស័យមាន​ជំងឺ​នេះ​ចំនួន ១៣៩​ករណីផងដែរ​។ នៅព្រឹក​ថ្ងៃពុធ អគ្គនាយក WHO លោក Tedros Adhanom Ghebreyesus បានប្រាប់អ្នកសារព័ត៌មានថា ជំងឺ Ebola ចំនួន ៣៣ករណី ត្រូវបានបញ្ជាក់​អះអាង​នៅសាធារណរដ្ឋប្រជាធិបតេយ្យកុងហ្គោ៕