ក្រុមជំនួយគ្រូពេទ្យគ្មានព្រំដែនបារាំង(MSF) បានចោទប្រកាន់រដ្ឋាភិបាលស៊ូដង់ខាងត្បូងថា រារាំងការចូលដល់ជំនួយមនុស្សធម៌ទៅកាន់តំបន់គ្រប់គ្រងដោយក្រុមប្រឆាំង ហើយពួកគេអះអាងថា ភាគីទាំងអស់ជាប់ពាក់ព័ន្ធជាមួយជម្លោះកំពុងកើតឡើងនៅប្រទេសក្រីក្រមួយនេះ បានកេងប្រវ័ញ្ចជំនួយ សម្រាប់គោលបំណងនយោបាយ និងយោធារបស់ខ្លួន ។

ការប៉ះទង្គិចគ្នារវាងយោធា និងយុទ្ធជនភក្តីភាពចំពោះគណបក្សកងទ័ពប្រឆាំងរំដោះប្រជាជន(SPLA-IO)របស់អនុប្រធានាធិបតីទី ១ ជាប់ឃុំខ្លួន លោក Riek Machar បានកើនឡើង ចាប់តាំងពីឆ្នាំមុនរហូតមក បង្ខំឲ្យមនុស្សរាប់ម៉ឺននាក់ជម្លៀសខ្លួនចេញពីផ្ទះសម្បែងរបស់ពួកគេ នៅតំបន់គ្រប់គ្រងរបស់ក្រុមប្រឆាំង ។

ក្រុមគ្រូពេទ្យ MSF និយាយនៅក្នុងរបាយរាយការណ៍ថា ពួកគេសង្កេតឃើញមាននិន្នាការពាក់ព័ន្ធនឹងការបិទជំនួយ លិខិតបង្ខិតបង្ខំដដែលៗ និងការបញ្ជាឲ្យជម្លៀសខ្លួនដោយរដ្ឋាភិបាលស៊ូដង់ខាងត្បូង លើជនស៊ីវិល និងអង្គការមនុស្សធម៌ នៅតាមតំបន់ប្រទាញប្រទង់គ្នាជាមួយគណបក្ស SPLA-IO ។

ពួកគេបន្តថា ក្នុងពេលតែមួយនេះដែរ ជំនួយត្រូវបានគេកេងប្រវ័ញ្ច សម្រាប់គោលបំណងយោធា និងនយោបាយ ដោយភាគីទាំងអស់នៅក្នុងជម្លោះ ។ ការបង្ខិតបង្ខំឲ្យអង្គការក្រៅរដ្ឋាភិបាលផ្លាស់ប្តូរទីតាំងផ្តល់ជំនួយទៅកន្លែងផ្សេងទៀត កំពុងធ្វើសហគមន៍ទាំងមូលលែងមានជំនួយសង្រ្គោះអាយុជីវិត ។

ក្រុមគ្រូពេទ្យ MSF និយាយដែរថា ការវាយប្រហារលើទីតាំងរបស់ពួកគេ រួមទាំងការទម្លាក់គ្រាប់បែកលើមន្ទីរពេទ្យ ២កន្លែងកាលពីខែឧសភា ឆ្នាំ ២០២៥ និងកាលពីខែកុម្ភៈ ឆ្នាំនេះ បានធ្វើឲ្យមនុស្ស ៧៦២.០០០នាក់ បាត់បង់ការថែទាំសុខភាព ៕