ក្តីបារម្ភខ្លាចស្លាប់ពីការរីករាលដាលឆ្លងជំងឺអេបូឡា កើតមាននៅទូទាំងសាធារណរដ្ឋប្រជាធិបតេយ្យកុងហ្គោ ក្នុងសប្តាហ៍នេះ ស្របពេលដែលពលរដ្ឋមកពីទីក្រុងឆ្ងាយៗរាប់សិបគ.ម បានចាប់ផ្តើមពាក់ម៉ាស និងអំពាវនាវឲ្យមានវិធានការការពារខ្លាំងជាងមុនប្រឆាំងនឹងការរីករាលដាលឆ្លងចុងក្រោយនេះ ។

ក្រុមអាជ្ញាធរនិយាយថា ករណីស្លាប់សង្ស័យដោយសារជំងឺអេបូឡា ២៦នាក់ទៀត ត្រូវបានរកឃើញក្នុងរយៈពេល ២៤ម៉ោងកន្លងមកនេះ នៅតំបន់ភាគខាងកើតកុងហ្គោ ហើយប្រមុខអង្គការសុខភាពពិភពលោក(WHO) បានបង្ហាញក្តីបារម្ភយ៉ាងខ្លាំងចំពោះការរីករាលដាលឆ្លងវីរុសមួយនេះ ។

ប្រមុខអង្គការសុខភាពពិភពលោក(WHO) លោក Tedros Adhanom Ghebreyesus បានប្រកាស ការរីករាលដាលឆ្លងជំងឺអេបូឡាថា ជាក្តីបារម្ភគ្រាអាសន្នសុខភាពសាធារណៈដែលជាក្តីបារម្ភមួយរបស់អន្តរជាតិ ។

យោងតាមការអះអាងរបស់ក្រុមអាជ្ញាធរសុខភាព បានឲ្យដឹងថា មនុស្សយ៉ាងហោ ១៣១នាក់ បានស្លាប់ ជាមួយនឹងករណីសង្ស័យ ៥៤៣នាក់ ហើយករណីបានបញ្ជាក់ ៣៣នាក់ នៅកុងហ្គោល ។ចំណែកករណីបញ្ជាក់ ២នាក់ ត្រូវបានរាយការណ៍ផងដែរនៅប្រទេសជិតខាងអ៊ូហ្គង់ដា ។

នៅទីក្រុង Bukavu និងរដ្ឋធានី Kinshasa អ្នកស្រុកមួយចំនួន និងក្រុមអាជីវករ បន្តធុរកិច្ចរបស់ពួកគេធម្មតា ជាមួយក្តីបារម្ភថា នឹងអាចឆ្លងជំងឺអេបូឡា តាមរយៈការប្រាស្រ័យទាក់ទងរាល់ថ្ងៃជាមួយអតិថិជនរបស់ពួកគេ ។

អ្នកស្រី Marie Evuto គឺជាអាជីវករតាមផ្លូវមួយរូបនៅរដ្ឋធានី Kinshasa និយាយថា គាត់សុំតែម្យ៉ាងទេ គឺបន្តស្អាតគ្រប់ទីកន្លែងដែលពួកយើងទៅ ដើម្បីចៀសវាងជំងឺមួយនេះ ពីព្រោះថា វាបានសម្លាប់មនុស្សច្រើនណាស់ ។ អ្នកស្រីបន្តថា ពួកយើងអាចនឹងមើលឃើញការស្លាប់ម្តងទៀត ដូចជាអំឡុងពេលរីករាលដាលឆ្លងសកលជំងឺ COVID-19 ៕