អ៊ីរ៉ង់បានគំរាមកាលពីថ្ងៃពុធ​​​២០​​ឧសភា​​សប្ដាហ៍នេះ​ថា នឹងពង្រីកសង្គ្រាមហួសពីតំបន់​​​មជ្ឈិមបូព៌ា ប្រសិនបើសហរដ្ឋអាមេរិកវាយប្រហារម្តងទៀត បន្ទាប់ពីប្រធានាធិបតី Donald Trump បាននិយាយថា លោក​​អាច​​នឹង​ចាប់ផ្តើមយុទ្ធនាការយោធាឡើងវិញ។

រយៈពេល​​​៦​សប្តាហ៍ចាប់តាំងពីលោក Trump បានផ្អាកប្រតិបត្តិការ Epic Fury សម្រាប់បទឈប់បាញ់ ​​​​​ការចរចាដើម្បីបញ្ចប់សង្គ្រាមភាគច្រើន បានជាប់គាំង។

អ៊ីរ៉ង់បានដាក់សំណើថ្មីមួយទៅអាមេរិកនៅសប្តាហ៍នេះ ប៉ុន្តែរបាយការណ៍សាធារណៈរបស់ខ្លួនអំពីសំណើ​​​នោះ​បាននិយាយឡើងវិញនូវលក្ខខណ្ឌដែលត្រូវបានបដិសេធកាលពី​​កន្លងទៅ​ដោយលោក Trump រួមទាំងការទាមទារសម្រាប់ការគ្រប់គ្រងច្រកសមុទ្រ Hormuz សំណងសម្រាប់ការខូចខាតសង្គ្រាម ការលើកលែង​ទណ្ឌកម្ម ការដោះលែង​ទ្រព្យសម្បត្តិដែល​ត្រូវបាន​បង្កក និងការដកកងទ័ពអាមេរិកចេញពីតំបន់នោះ។

លោក Trump បាននិយាយកាលពីថ្ងៃចន្ទ និងម្តងទៀតនៅថ្ងៃអង្គារថាសប្ដាហ៍នេះ​ថា​ ​ លោកបានខិតជិតដល់ការបញ្ជាឱ្យមានយុទ្ធនាការទម្លាក់គ្រាប់បែកជាថ្មី​ ប៉ុន្តែបានពន្យារពេលនៅនាទីចុងក្រោយដើម្បីផ្តល់ពេលវេលាបន្ថែមទៀតសម្រាប់ការទូត។

អ៊ីរ៉ង់ ​បានគំរាមម្តងហើយម្តងទៀតថានឹងសងសឹកចំពោះការវាយប្រហារថ្មីណាមួយ ​ដោយការវាយប្រហារលើ​​បណ្ដា​ប្រទេសនៅមជ្ឈិមបូព៌ា ដែលមានមូលដ្ឋានទ័ពអាមេរិក។ កាលពី​ថ្ងៃពុធ ​ប្រទេស​​នេះ បាន​លើកឡើងថា​ ​​ ខ្លួនក៏នឹងវាយប្រហារគោលដៅនៅឆ្ងាយៗផងដែរ។

កងឆ្មាំបដិវត្តន៍អ៊ីស្លាម​​អ៊ីរ៉ង់​​បាននិយាយក្នុងសេចក្តីថ្លែងការណ៍មួយ​ចេញ​​ផ្សាយលើប្រព័ន្ធផ្សព្វផ្សាយរដ្ឋថា​ ​ប្រសិនបើការឈ្លានពានប្រឆាំងនឹងអ៊ីរ៉ង់ត្រូវបានធ្វើម្តងទៀត សង្គ្រាមក្នុងតំបន់ដែលបានសន្យាលើកនេះនឹងរីករាលដាលទៅឆ្ងាយហួសពីតំបន់នេះ​ ហើយការវាយប្រហារដ៏សាហាវរបស់យើងនឹងកម្ទេចអ្នក​៕