យោងតាមប្រព័ន្ធផ្សព្វផ្សាយរដ្ឋ ប្រធានាធិបតីរុស្ស៊ី លោក ​ Vladimir Putin និងសមភាគីចិន លោក Xi Jinping បានចុះហត្ថលេខាលើសេចក្តីថ្លែងការណ៍រួមស្តីពីកិច្ចសហប្រតិបត្តិការនៅទីក្រុងប៉េកាំងកាលពីថ្ងៃពុធ​​២០​​ឧសភា សប្ដាហ៍នេះ ។​

លោក Putin ​​កាលពីថ្ងៃពុធបានសង្កត់ធ្ងន់លើការពង្រីកទំនាក់ទំនងទ្វេភាគីសំខាន់ៗ​យ៉ាងច្រើនជាមួយប្រទេសចិន និងបានសម្តែងការប្តេជ្ញាចិត្តរបស់លោកក្នុងការជំរុញកិច្ចសហប្រតិបត្តិការទាំងកម្រិតទ្វេភាគី និងអន្តរជាតិ។

សេចក្តីថ្លែងការណ៍នេះ ដែលមានគោលបំណង «បង្កើនបន្ថែមទៀត» ការសម្របសម្រួលជាយុទ្ធសាស្ត្ររវាងប្រទេសទាំងពីរ និងពង្រឹង «ភាពជាអ្នកជិតខាងល្អ និងកិច្ចសហប្រតិបត្តិការមិត្តភាព» ត្រូវបានចុះហត្ថលេខារួមជាមួយនឹងកិច្ចព្រមព្រៀងមួយចំនួនទៀត ដែលគ្របដណ្តប់លើវិស័យដូចជាបច្ចេកវិទ្យា និងពាណិជ្ជកម្មជាដើម​ ។

មេដឹកនាំទាំងពីរ ដែលក៏បានចូលរួមក្នុងពិធីបើកគំនិតផ្តួចផ្តើមអប់រំរួមគ្នាថ្មីមួយផងដែរ​​ ​បាន​​​ជួបគ្នាត្រឹមតែប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump បានបញ្ចប់ដំណើរទស្សនកិច្ចដែលមានការផ្សព្វផ្សាយយ៉ាងទូលំទូលាយទៅកាន់ទីក្រុងប៉េកាំង ដោយចាកចេញពីប្រទេសចិនកាលពីថ្ងៃសុក្រ១៥​ឧសភា សប្ដាហ៍មុន​​ ដែល​​​ហាក់ដូចជាពុំ​​មានវឌ្ឍនភាពអ្វីធំដុំលើពាណិជ្ជកម្ម អ៊ុយក្រែន ឬសង្គ្រាមរបស់លោកជាមួយអ៊ីរ៉ង់ឡើយ។

ដោយស្វាគមន៍លោក Putin ​ នៅក្នុងសាលប្រជុំប្រជាជនក្រុងប៉េកាំង ដើម្បីប្រារព្ធខួបលើកទី២៥​​ នៃសន្ធិសញ្ញាភាពជាអ្នកជិតខាងល្អ និងកិច្ចសហប្រតិបត្តិការមិត្តភាពរវាងចិន-រុស្ស៊ី លោក Xi បានសរសើរទំនាក់ទំនងរឹងមាំរវាងទីក្រុងមូស្គូ និងទីក្រុងប៉េកាំង និងបានអំពាវនាវឱ្យមានកិច្ចសហប្រតិបត្តិការបន្ថែមទៀតរវាងរដ្ឋធានីទាំងពីរ៕