អ្នកនាំពាក្យរបស់លោកបាននិយាយកាលពីថ្ងៃពុធថា អគ្គលេខាធិការ UN លោក អង់តូនីញ៉ូ ហ្គុយតឺរេស (Antonio Guterres) ថ្កោលទោស «ដោយប្រើពាក្យសម្តីខ្លាំងបំផុត» ចំពោះការសម្រេចចិត្តរបស់អាជ្ញា ធរអ៊ីស្រាអែលក្នុងការបង្កើតមូលដ្ឋានយោធា នៅក្នុងបរិវេណរបស់ទីភ្នាក់ងារសង្គ្រោះ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីននៅដើមបូព៌ា (UNRWA) ក្នុងទីក្រុងហ្ស៊េរុយសាឡឹមខាងកើត ដែលពួកគេបានរឹបអូសកាលពីខែមករា។

អ្នកនាំពាក្យលោក Stephane Dujarric បាននិយាយនៅក្នុងសេចក្តីថ្លែងការណ៍មួយថា៖«វិធានការដែលមិនធ្លាប់មានពីមុនមក និងកាន់តែធ្ងន់ធ្ងរទាំងនេះប្រឆាំងនឹង UNRWA គឺជាការរំលោភលើភាពមិនអាចរំលោភបាននៃទីតាំងរបស់UN។ មូលដ្ឋានយោធាទាំងនេះ គឺជាឧបសគ្គដល់ការអនុវត្តអាណត្តិច្បាស់លាស់របស់មហាសន្និបាតសម្រាប់ការបន្តប្រតិបត្តិការរបស់ UNRWA នៅក្នុងទឹកដីប៉ាឡេស្ទីនដែលគ្រប់គ្រងដោយអ៊ីស្រាអែល រួមទាំងទីក្រុងហ្ស៊េរុយសាឡឹមផងដែរ»។

សេចក្តីថ្លែងការណ៍នេះ បានបញ្ជាក់ថា៖«លោកអគ្គលេខាធិការចាត់ទុកការបន្តសកម្មភាពកាន់តែខ្លាំងឡើងប្រឆាំងនឹង UNRWA ថា មិនអាចទទួលយកបានទាំងស្រុង។ លោកមានការសោកស្តាយយ៉ាងខ្លាំងដែលអាជ្ញាធរអ៊ីស្រាអែលបន្តចាត់វិធានការដែលរំលោភលើកាតព្វកិច្ចរបស់ពួកគេទាក់ទងនឹងសិទ្ធិនិងអភ័យឯកសិទ្ធិរបស់UN»។

ខណៈដែលតុលាការយុត្តិធម៌អន្តរជាតិ (ICJ)បានបញ្ជាក់ថា សកម្មភាពបែបនេះ គឺខុសច្បាប់ សេចក្តីថ្លែងការណ៍នេះបានសង្កត់ធ្ងន់ថា អ៊ីស្រាអែលមិនមានសិទ្ធិអនុវត្តអំណាចអធិបតេយ្យភាព នៅក្នុងផ្នែកណាមួយនៃទឹកដីប៉ាឡេស្ទីននោះទេ ហើយមានកាតព្វកិច្ចបញ្ចប់វត្តមានខុសច្បាប់របស់ខ្លួន នៅក្នុងទឹកដីប៉ាឡេស្ទីនដែលខ្លួនគ្រប់គ្រង រួមទាំងក្រុងហ្ស៊េរុយសាឡឹមខាងកើត ឲ្យបានឆាប់រហ័សតាមដែលអាចធ្វើទៅបាន៕