​បាល់ទាត់៖ ​ក្រុម​យក្ស​អេ​ស្ប៉ា​ញ FC Barcelona បាន​រង​បរាជ័យ​គួរឱ្យភ្ញាក់ផ្អើល​ក្នុង​ទឹកដី​ខ្លួនឯង​ ក្រោម​ស្នាដៃ​ក្រុម​ភ្ញៀវ​ក្បែរ​បាត​តារាង Cadiz ១-០ មុនពេល​បាតុកម្ម​ផ្ទុះឡើង​ក្រោយ​ចប់​ការប្រកួត​។

​​ក្រុម​ភ្ញៀវ Cadiz ចាប់ផ្តើម​ការប្រកួត​ដោយ​ឈរ​ក្នុង​តំបន់​គ្រោះថ្នាក់ តែមួយ​គ្រាប់​ជ័យជំនះ​របស់ Lucas Perez នៅ​នាទី​ទី៤៨ ធ្វើឱ្យ Cadiz ទទួលបាន​ ៣ពិន្ទុ​ដ៏​មាន​សារសំខាន់​ឡើង​មកឈរ​លេខ ១៦ មាន ៣២ពិន្ទុ​ពីលើ​តំបន់​គ្រោះថ្នាក់ ៣ពិន្ទុ​វិញ​។ ​​នេះ​ជា​បរាជ័យ​ក្នុងផ្ទះ​ដំបូង​របស់ Barcelona នៅ La Liga តាំងពី​ថ្ងៃទី៤ ខែធ្នូ និង​បញ្ចប់​ដំណើរ​មិន​ចាញ់ ១៥ប្រកួត​ជាប់​គ្នា​ក្នុង​លី​គ ហើយក៏​ជា​បរាជ័យ​ក្នុងផ្ទះ ២ប្រកួត​ជាប់​គ្នា​ផងដែរ​រាប់ទាំង​ចាញ់ Frankfurt ធ្លាក់​ពី UEFA Europa League សប្តាហ៍​មុន​។

​​អ្នកគាំទ្រ Barcelona ក្រោយ​ចប់​ការប្រកួត​គេ​ឃើញ​មានការ​ផ្ទុះឡើងនៃ​បាតុកម្ម​ ប្រឆាំង​ប្រធាន​ក្លិប​បច្ចុប្បន្ន​លោក Joan Laporta ផងដែរ​។ ​​បរាជ័យ​របស់ Barcelona បានធ្វើឱ្យ​ក្រុម​គូប្រជែង Real Madrid កាន់តែ​កៀក​ក្នុងការ​គ្រង​ជើងឯក​ដោយ​ក្រុម​របស់លោក Carlo Ancelotti នៅពេលនេះ​ដាច់ ១៥ពិន្ទុ​ ខណៈ​នៅសល់ ៧ប្រកួត​ទៀត​ចប់​រដូវ​កាល​៕

​អត្ថបទ​៖​នាង សុភា​វុ​ធ