អំឡុងពេលសន្ទនាតាមទូរស័ព្ទ កាលពីថ្ងៃពុធ (ទី២០ ខែឧសភា ឆ្នាំ២០២៦) ប្រធានាធិបតីទួរគី លោក Tayyip Erdogan បានប្រាប់ប្រធានាធិបតីអាមេរិក លោក Donald Trump ថា លោកស្វាគមន៍ ចំពោះការពង្រីកបន្ថែមពេលវេលានៃបទឈប់បាញ់ រវាងសហរដ្ឋអាមេរិក និងអ៊ីរ៉ង់ ដោយបញ្ជាក់ថា លោកជឿថាបញ្ហាជម្លោះ រវាងភាគីទាំង២ អាចត្រូវបានដោះស្រាយ។ នេះបើយោងតាមការិយាល័យមេដឹកនាំទួរគី។
ទួរគីដែលជាប្រទេសសមាជិករបស់អង្គការណាតូ និងជាអ្នកជិតខាងជាមួយអ៊ីរ៉ង់ បានទាក់ទងយ៉ាងជិតស្និទ្ធទាំងជាមួយទីក្រុងវ៉ាស៊ីនតោន តេអេរ៉ង់ និងអ្នកសម្របសម្រួលប៉ាគីស្ថាន ដើម្បីស្វែងរកការបញ្ចប់សង្គ្រាមនេះ។ ទួរគីបានអំពាវនាវឲ្យបញ្ចប់ជម្លោះ និងបញ្ជូនសារទៅមក រវាងភាគីទាំង២។
លោក Trump បាននិយាយមុននេះថា ការចរចាជាមួយអ៊ីរ៉ង់ កំពុងស្ថិតក្នុងដំណាក់កាលចុងក្រោយ ខណៈពេលដែលព្រមានអំពីការវាយប្រហារបន្ថែមទៀត ប្រសិនបើទីក្រុងតេអេរ៉ង់មិនយល់ព្រមឈានដល់កិច្ចព្រមព្រៀងសន្តិភាពទេនោះ។
ការិយាល័យប្រធានាធិបតីបានឲ្យដឹងនៅក្នុងសេចក្តីថ្លែងការណ៍មួយថា៖ «ក្នុងអំឡុងពេលមានជំនួបនោះ ប្រធានាធិបតីរបស់យើង បានលើកឡើងថា លោកបានមើលឃើញការសម្រេចចិត្តបន្ថែមពេលវេលានៃបទឈប់បាញ់ នៅក្នុងតំបន់ជម្លោះ នៅក្នុងតំបន់របស់យើងថា ជាការវិវត្តដ៏វិជ្ជមានមួយ (ហើយ) លោកជឿថាដំណោះស្រាយសមហេតុផល ចំពោះបញ្ហាជម្លោះនេះ គឺអាចកើតឡើងបាន»។
ការិយាល័យនេះបានបន្ថែមថា ជាមួយគ្នានេះ លោក Erdogan បានចាត់ទុកការមានស្ថិរភាពឡើងវិញ នៅក្នុងប្រទេសស៊ីរីថា ជា «លទ្ធផលជោគជ័យដ៏សំខាន់» សម្រាប់តំបន់នេះ ដោយបានសង្កត់ធ្ងន់ថា លោកបានជំរុញឲ្យមានវិធានការនានា ដើម្បីទប់ស្កាត់ស្ថានការណ៍ នៅក្នុងប្រទេសលីបង់ ដែលកំពុងកាន់តែអាក្រក់ទៅៗ ក្នុងពេលមានការប្រយុទ្ធគ្នាជាបន្តបន្ទាប់ រវាងអ៊ីស្រាអែល និងក្រុមហេសបូឡា៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
