សមាជិក​ព្រឹទ្ធសភា​អាមេរិកមួយក្រុមរបស់​គណបក្ស​​ប្រជាធិបតេយ្យ​ ​កាលពី​ថ្ងៃពុធ (ទី២០ ខែឧសភា ឆ្នាំ២០២៦) ​បានបង្ហាញ​នូវ​សំណើផ្លូវ​ការ​​ ​ដើម្បី​រារាំង​​លោក​ប្រធានាធិបតី Donald Trump កុំ​ឲ្យ​ប្រើប្រាស់​វិធានការ​យោធា លើ​​ប្រទេស​គុយបា ខណៈ​រដ្ឋបាល​របស់​លោក ​បាន​បង្កើន​សម្ពាធ​លើ​រដ្ឋាភិបាលរបស់​​កោះ​នេះ​ ដោយ​បាន​ចោទប្រកាន់ផ្លូវការ​លើ​​​អតីត​ប្រធានាធិបតី លោក​ Raul Castro។

ក្រុម​​ប្រជាធិបតេយ្យ លោក​ Tim Kaine មកពី​រដ្ឋ Virginia លោក Adam Schiff មកពី​រដ្ឋ California និង​លោក Ruben Gallego មកពី​រដ្ឋ Arizona បានបង្ហាញ​នូវ​សំណើផ្លូវ​ការ​ ​ស្តីពី​អំណាច​សង្គ្រាម​ ដើម្បី​រារាំង​ការប្រើប្រាស់​កងកម្លាំង​ប្រដាប់អាវុធ​របស់​សហរដ្ឋអាមេរិក លើ​​កោះ​ដែល​គ្រប់គ្រង​ដោយ​លទ្ធិ​កុម្មុយនីស្ត​​មួយ​នេះ។

តំណាង​រាស្ត្រ​ទាំង​នោះ ​បាន​លើកឡើង​ពី​ការគំរាមកំហែង​ម្តងហើយម្តងទៀត​របស់​លោក​ប្រធានាធិបតីរបស់​គណបក្ស​​សាធារណរដ្ឋ ​ក្នុងការ​បញ្ជូន​កងទ័ព ​ដើម្បី​ផ្លាស់ប្តូរ​រដ្ឋាភិបាល​ នៅ​ទីក្រុងឡាហាវ៉ាន និង​របាយការណ៍​ ដែល​ថា បញ្ជាការ​ភាគខាងត្បូង​របស់​សហរដ្ឋអាមេរិក​ ត្រូវបាន​បញ្ជា​ឲ្យ​រៀបចំ​ផែនការ​វាយប្រហារ ទោះបីជា​​គុយបា​មិន​បង្ក​ការគំរាមកំហែងធំ​ដល់​​សន្តិសុខ​ជាតិ​​​របស់​​​សហរដ្ឋអាមេរិក​ក៏ដោយ។

លោក Kaine ដែលជា​អ្នក​ដឹកនាំ​​កិច្ចប្រឹងប្រែង​នៅក្នុង​សភា ​ដើម្បី​អនុវត្ត​បទប្បញ្ញត្តិ​របស់​រដ្ឋធម្មនុញ្ញ​ ដែលចែង​​ថា គឺ​ស្ថាប័ន​នីតិបញ្ញត្តិ មិនមែន​ប្រធានាធិបតី​ទេ ដែល​មាន​អំណាច​ប្រកាស​សង្គ្រាម​នោះ បាន​និយាយ​ថា៖ «យោធាអាមេរិក គឺល្អបំផុតនៅលើពិភពលោក ប៉ុន្តែសមាជិកកងទ័ពរបស់យើង មិនគួរត្រូវបានបញ្ជូនទៅក្នុងគ្រោះថ្នាក់នោះទេ នៅពេលដែលមិនមានអត្ថប្រយោជន៍ច្បាស់លាស់ដល់សហរដ្ឋអាមេរិក»។

យ៉ាង​ណាក្ដី ទោះបីជាសមាជិកសភា រួមទាំងសមាជិកគណបក្សសាធារណរដ្ឋមួយចំនួនផង​ដែរ​ មានក្ដី​បារម្ភ អំពីការដាក់ពង្រាយកងកម្លាំងអាមេរិកច្រើនលើកច្រើនសាររបស់លោក Trump ក៏ដោយ ក៏វាមិនមាន​ភាព​ច្បាស់លាស់​ភ្លាមៗនោះដែរ​ថា តើការ​ស្នើផ្លូវ​ការ​ ស្ដីពី​​អំណាចសង្គ្រាម ពាក់ព័ន្ធនឹង​គុយបានេះ​ នឹងទទួល​​បានជោគ​ជ័យ​​យ៉ាងដូចម្តេច នៅក្នុងសភា ដែលសមាជិកគណបក្សសាធារណរដ្ឋរបស់លោក Trump មានសំឡេងភាគច្រើន ៥៣ ទល់​នឹង​ ៤៧សំឡេង​៕