អធិការបតីអាល្លឺម៉ង់ លោក Friedrich Merz បានស្នើផ្ដល់​ឲ្យ​អ៊ុយក្រែននូវ​តួនាទីដោយផ្ទាល់ នៅក្នុងរចនាសម្ព័ន្ធសហភាពអឺរ៉ុប (EU) ជាជំហានបណ្តោះអាសន្នមួយ ឆ្ពោះ​ទៅកាន់សមាជិកភាពរបស់​ប្លុក​នេះ​ ដែលលោកបាននិយាយថា អាចជួយសម្រួលដល់កិច្ចព្រមព្រៀង ដើម្បីបញ្ចប់សង្គ្រាមដែលបង្កឡើងដោយការឈ្លានពានរបស់រុស្ស៊ី​។

នៅក្នុងលិខិតមួយច្បាប់​ផ្ញើទៅកាន់មេដឹកនាំ EU ដែលទីភ្នាក់ងារ​សារព័ត៌មា Reuters បានឃើញ លោក Merz បានលើក​ឡើង​ថា អ៊ុយក្រែនអាចត្រូវបានផ្តល់ឋានៈថ្មី ជា «សមាជិកភាពមិន​ពេញ​លេញ​» ដែលនឹងអនុញ្ញាតឲ្យ​មន្ត្រីអ៊ុយក្រែនចូលរួមក្នុងកិច្ចប្រជុំកំពូល និងកិច្ចប្រជុំរដ្ឋមន្ត្រីរបស់ EU ប៉ុន្តែមិនអាចបោះឆ្នោតក្នុងកិច្ចប្រជុំទាំងនោះបានឡើយ​។

មេដឹកនាំអាល្លឺម៉ង់ក៏បានស្នើឲ្យសមាជិក EU «ប្តេជ្ញាចិត្តខាងនយោបាយ» ដើម្បីអនុវត្តលក្ខខណ្ឌ​ផ្ដល់​ជំនួយទៅវិញទៅមករបស់ប្លុកនេះ ចំពោះអ៊ុយក្រែន «ក្នុង​គោល​បំណង​បង្កើតការធានាសន្តិសុខដ៏សំខាន់»។

អ្នកវិភាគ លើកឡើង​ថា​ ផ្លូវដ៏​ច្បាស់លាស់មួយចូលជា​សមាជិក​របស់​ EU អាចមានសារៈសំខាន់ សម្រាប់លោក​ប្រធានាធិបតី Volodymyr Zelensky ដើម្បីឲ្យទទួល​យក​​ដំណោះស្រាយ​សន្តិភាពណាមួយ សម្រាប់​ជនជាតិអ៊ុយក្រែន ជាពិសេសប្រសិនបើ ដូចដែលមាន​ការ​រំពឹងទុកយ៉ាងទូលំទូលាយ អ៊ុយក្រែនមិនបានគ្រប់គ្រងទឹកដីទាំងអស់របស់ខ្លួន​វិញ ឬចូលរួមជាមួយសម្ព័ន្ធភាពយោធាណាតូ។

សំណើរបស់លោក Merz តំណាងឲ្យ​ការប៉ុនប៉ងស្វែងរកផ្លូវកណ្តាល រវាងការចូលជាសមាជិករហ័ស និងឋានៈបច្ចុប្បន្នរបស់អ៊ុយក្រែនជាប្រទេសបេក្ខជន នៅពេលចាប់ផ្តើមដំណើរការ៕