កាលពីថ្ងៃពុធ (ទី២០ ខែឧសភា ឆ្នាំ២០២៦) នគរបាល​អ៊ីស្រាអែលបានបង្ខំសកម្មជនដែលនៅលើកងនាវាជំនួយឆ្ពោះ​ទៅតំបន់ហ្កាហ្សាឲ្យ​លុតជង្គង់ លើដីជាជួរៗ ដោយដៃរបស់ពួកគេត្រូវបានចងស្លាបសេក (ចង​ក្រពាត់ទៅ​ក្រោយ) ខណៈពេលដែលរដ្ឋមន្ត្រីម្នាក់ កំពុងសម្លឹងមើល ជាទង្វើ​ដែលនាំឲ្យ​មានការរិះគន់ពីមេដឹកនាំបរទេស និងសូម្បីតែពីខាងក្នុងរដ្ឋាភិបាលអ៊ីស្រាអែលផ្ទាល់តែ​ម្ដង​។

សកម្មជនទាំងនោះត្រូវបានឃុំខ្លួន បន្ទាប់ពីកងនាវារបស់ពួកគេត្រូវបានឃាត់​ទុក​ដោយកងកម្លាំងអ៊ីស្រាអែល នៅក្នុងដែនទឹកអន្តរជាតិ កាលពីថ្ងៃអង្គារ ហើយក្រោយមកត្រូវបាននាំទៅកាន់កំពង់ផែរបស់​​អ៊ីស្រាអែល​។ កងនាវាទាំង​នេះ ដែលបានចេញដំណើរពីភាគខាងត្បូងនៃ​ប្រទេសទួរគី កំពុងព្យាយាមជាថ្មី​ ដើម្បីផ្តល់ជំនួយទៅកាន់តំបន់ហ្កា​ហ្សាដែលរងការបំផ្លិចបំផ្លាញដោយសង្គ្រាម បន្ទាប់ពីបេសកកម្មមុនៗ ក៏ត្រូវបានស្ទាក់ចាប់​​ដោយអ៊ីស្រាអែលផងដែរ។

បន្ទាប់ពីនគរបាល​បានឃុំខ្លួនសកម្មជនទាំង​នោះ​ ដែលអ្នករៀបចំ បាននិយាយថា មានមនុស្សចំនួន ៤៣០​នាក់ ក្នុងនោះ​រួមមាន​ទាំងពលរដ្ឋអ៊ីតាលី និងកូរ៉េខាងត្បូងផង​ដែរ​ រដ្ឋមន្ត្រីនគរបាលស្តាំនិយមជ្រុល​របស់អ៊ីស្រាអែល លោក Itamar Ben-Gvir បានបង្ហោះវីដេអូមួយនៅលើបណ្ដាញ​សង្គម​ X ដែលបង្ហាញពីមន្ត្រីនគរបាលកំពុងបង្ខំសកម្មជនម្នាក់ឲ្យ​ក្រាប​ទៅលើដី បន្ទាប់ពីរូប​​នាងស្រែកថា «ផ្ដល់​សេរីភាព​ឲ្យ​ប៉ាឡេស្ទីន»។ វីដេអូនេះក៏បង្ហាញពីសកម្មជនដែលត្រូវបានឃុំខ្លួនរាប់សិបនាក់ កំពុងលុតជង្គង់ជាជួរៗ ដោយដៃរបស់ពួកគេត្រូវបានចងក្រពាត់​ទៅ​ក្រោយ។

ប្រទេសជាច្រើន នៅអឺរ៉ុប កាលពីថ្ងៃពុធ បានរិះគន់យ៉ាងខ្លាំង ចំពោះការប្រព្រឹត្តលើ​សកម្មជនបែប​នេះរបស់អ៊ីស្រាអែល ដោយថ្កោលទោសថា ជាអំពើមិនអាចទទួលយកបាន និងអមនុស្សធម៌។ រដ្ឋមន្ត្រីការបរទេស និងមេដឹកនាំនៃប្រទេសអេស្ប៉ាញ អង់គ្លេស អៀរឡង់ បារាំង អ៊ីតាលី ហូឡង់ និងអូទ្រីស បានពិពណ៌នាអំពីសកម្មភាពរបស់អ៊ីស្រាអែលថា ជាការរំលោភលើសេចក្តីថ្លៃថ្នូររបស់មនុស្ស ខណៈពេលដែលក៏ទាមទារផងដែរ​ឲ្យ​មានការពន្យល់ ការសូម​អភ័យ​ទោស និងការ​ដោះលែងពលរដ្ឋរបស់ពួកគេ៕