ដោយដកស្រង់សម្តីមន្ត្រីជាន់ខ្ពស់រដ្ឋាភិបាលម្នាក់ ទីភ្នាក់ងារសារព័ត៌មាន Yonhap របស់កូរ៉េខាងត្បូង បានរាយការណ៍កាល​ពី​យប់ថ្ងៃពុធ (ទី២០ ខែឧសភា ឆ្នាំ២០២៦) ថា ប្រធានាធិប​តី​ចិន លោក Xi Jinping អាច​នឹង​ទៅ​ទស្សនកិច្ច នៅ​កូរ៉េខាង​ជើង​ អំឡុង​សប្ដាបហ៍ក្រោយ​។

ប្រភពរដ្ឋាភិបាលមួយផ្សេងទៀត ត្រូវបានដកស្រង់សម្តី ដែល​បាន​និយាយ​ថា ក្រុមមន្ត្រីសន្តិសុខ និងពិធីការចិនមួយក្រុម បានទៅដល់ទីក្រុងព្យុងយ៉ាងថ្មីៗនេះ ហើយថា ដំណើរទស្សនកិច្ចរបស់លោក Xi នៅចុងខែឧសភា ឬដើមខែមិថុនា ទំនងជាអាចកើត​ឡើង​។

មន្ត្រីជាន់ខ្ពស់រូបនេះ ត្រូវបានដកស្រង់សម្តី ដែល​បាន​និយាយ​ថា លោក Xi ដែលបានទទួលប្រធានាធិបតីអាមេរិក លោក Donald Trump កាលពីសប្តាហ៍មុន នឹងព្យាយាមធ្វើជាអ្នកសម្របសម្រួល រវាងលោក Trump និងមេដឹកនាំកូរ៉េខាងជើង លោក​ Kim Jong Un។ ក្រសួងការបរទេសកូរ៉េខាងត្បូង មិនបានធ្វើអត្ថាធិប្បាយភ្លាមៗឡើយ ជុំវិញរបាយការណ៍នេះ។

ប្រទេសចិន គឺជាសម្ព័ន្ធមិត្តសេដ្ឋកិច្ច និងនយោបាយដ៏សំខាន់របស់កូរ៉េខាងជើង ហើយប្រទេសទាំង២ បានខិតខំប្រឹងប្រែងពង្រឹងទំនាក់ទំនង ដែលបានថមថយ ក្នុងអំឡុងពេលមានជំងឺរាតត្បាតកូវីដ១៩។ លោក Kim បានទៅទស្សនកិច្ចទីក្រុងប៉េកាំង ក្នុងឆ្នាំ២០២៥ ហើយបានឈរក្បែរលោក Xi និងប្រធានាធិបតីរុស្ស៊ី លោក Vladimir Putin អំឡុងពេល​មាន​​ព្រឹត្តិការណ៍ព្យុហយាត្រា​យោធាដ៏ធំ៕