យោធាសហរដ្ឋអាមេរិកបានប្រកាសកាលពីថ្ងៃពុធ (ទី២០ ខែឧសភា ឆ្នាំ២០២៦) ថា ក្រុមនាវាផ្ទុកយន្តហោះវាយប្រហារ USS Nimitz បានទៅដល់តំបន់ការ៉ាអ៊ីពហើយ​ ស្រប​ពេលមានភាពតានតឹងកាន់តែខ្លាំងឡើង រវាងសហរដ្ឋអាមេរិក និងប្រទេស​គុយបា។

នៅក្នុងសេចក្តីថ្លែងការណ៍មួយដែលបានបង្ហោះនៅលើវេទិកាបណ្ដាញ​សង្គម X បញ្ជាការភាគខាងត្បូងសហរដ្ឋអាមេរិកបានឲ្យ​ដឹង​ថា៖ «​នាវាផ្ទុកយន្តហោះ USS Nimitz និងក្រុម​ជំនួយ​ផ្សេង​ទៀត​ គឺជាគំរូនៃការត្រៀមខ្លួន និងវត្តមាន ការទៅដល់ និងភាពខ្លាំង​ក្លាដែលមិនអាចប្រៀបផ្ទឹមបាន និងគុណសម្បត្តិជាយុទ្ធសាស្ត្រ»។

បញ្ជាការ​នេះ​បានបន្ថែមថា នាវាផ្ទុកយន្តហោះ USS Nimitz «បានបង្ហាញពីសមត្ថភាពប្រយុទ្ធរបស់ខ្លួននៅទូទាំងពិភពលោក ដោយធានាបាននូវស្ថិរភាព និងការពារលទ្ធិប្រជាធិបតេយ្យ ចាប់ពីច្រកសមុទ្រតៃវ៉ាន់ រហូតដល់ឈូងសមុទ្រអារ៉ាប់»។

គួរ​បញ្ជាក់​ថា ការដាក់ពង្រាយនេះបានកើតឡើងនៅថ្ងៃដដែលដែលរដ្ឋបាលរបស់​លោក​ប្រធានាធិបតី​លោក Donald Trump បានប្រកាសពីការចោទប្រកាន់ព្រហ្មទណ្ឌ ប្រឆាំងនឹងអតីតប្រធានាធិបតីគុយបា លោក Raul Castro ជុំវិញ​ការចោទ​ប្រកាន់​ថា បាន​បាញ់ទម្លាក់យន្តហោះស៊ីវិល ២គ្រឿងដែលជាកម្មសិទ្ធិរបស់ក្រុមនិរទេសខ្លួន Brothers to the Rescue ដែលមានមូលដ្ឋាននៅទីក្រុង Miami ក្នុងឆ្នាំ១៩៩៦ ជាហេតុការណ៍​ដែលបានសម្លាប់មនុស្ស ៤នាក់ រួមទាំងជនជាតិអាមេរិក ៣នាក់ផងដែរ។

លោក Trump បាននិយាយដដែល​ៗ​ថា គុយបាគឺជា «ប្រទេសបន្ទាប់» បន្ទាប់ពីមាន​ប្រតិបត្តិការយោធាប្រឆាំងនឹងអ៊ីរ៉ង់ ហើយបានអះអាងថា ប្រទេសកោះគ្រប់គ្រងដោយកុម្មុយនីស្តមួយនេះ នឹងដួលរលំ «ឆាប់ៗនេះ»។

ចំណែក​អនុរដ្ឋមន្ត្រីក្រសួងការបរទេសគុយបា លោក Carlos Fernandez de Cossio បានព្រមាននៅថ្ងៃពុធនោះថា វិធានការ​យោធាណាមួយរបស់សហរដ្ឋអាមេរិក លើ​មន្ត្រីគុយបាដែលត្រូវបានចោទប្រកាន់ដោយទីក្រុងវ៉ាស៊ីនតោន នឹងជួបប្រទះនឹង «ការតស៊ូយ៉ាងខ្លាំងក្លា» ពីប្រជាជនគុយបា៕