រដ្ឋមន្ត្រីក្រសួងមហាផ្ទៃប៉ាគីស្ថាន លោក Mohsin Naqvi បានជួបជាមួយរដ្ឋមន្ត្រីការបរទេសអ៊ីរ៉ង់ លោក Abbas Araqchi នៅថ្ងៃព្រហស្បតិ៍ ​​២១​ឧសភា​​នេះ​ ខណៈប៉ាគីស្ថានបានបង្កើនកិច្ចខិតខំប្រឹងប្រែងផ្នែកការទូត ដើម្បីពន្លឿនកិច្ចចរចាសន្តិភាពរវាងអាមេរិក និងអ៊ីរ៉ង់។​​​

យោងតាមអ្នកនាំពាក្យក្រសួងការបរទេសអ៊ីរ៉ង់​​​ លោក Esmaeil Baghaei បានឲ្យដឹងថា ប៉ាគីស្ថាន ដែលបានរៀបចំកិច្ចចរចាសន្តិភាពកាលពីខែមុន និងកំពុងដើរតួជាផ្លូវសម្រាប់សាររវាងភាគីទាំងពីរ នៅតែបន្តសម្របសម្រួលរវាងទីក្រុងតេអេរ៉ង់ និងទីក្រុងវ៉ាស៊ីនតោន ជាមួយនឹងការទំនាក់ទំនងជាច្រើនជុំបានកើតឡើង។ រដ្ឋមន្ត្រីក្រសួងមហាផ្ទៃប៉ាគីស្ថានក៏កំពុង​​ស្ថិត​នៅក្នុង​​ទីក្រុងតេអេរ៉ង់​​​កាលពី​​ថ្ងៃពុធ ២០ ឧសភា ផងដែរ។​​

ទីក្រុងតេអេរ៉ង់បាននិយាយថា ខ្លួនកំពុងពិនិត្យមើលការឆ្លើយតបចុងក្រោយបំផុតរបស់ទីក្រុងវ៉ាស៊ីនតោន ហើយលោកប្រធានាធិបតី Donald Trump បានលើកឡើង​​ថា​​ លោកអាចរង់ចាំពីរទៅ​​​បីថ្ងៃសម្រាប់ "ចម្លើយត្រឹមត្រូវ" ពីទីក្រុងតេអេរ៉ង់ ប៉ុន្តែក៏មានឆន្ទៈក្នុងការបន្តការវាយប្រហារលើប្រទេសនេះផងដែរ។​​

ប្រាំមួយសប្តាហ៍ចាប់តាំងពីបទឈប់បាញ់ដ៏ផុយស្រួយមួយបានចូលជាធរមាន ការចរចាដើម្បីបញ្ចប់សង្គ្រាមមានវឌ្ឍនភាពតិចតួច ខណៈ​​តម្លៃប្រេងដែលកើនឡើងខ្ពស់បានបង្កើនការព្រួយបារម្ភអំពីអតិផរណា និងផលប៉ះពាល់លើសេដ្ឋកិច្ចពិភពលោក៕