ប្រទេសជប៉ុន នៅថ្ងៃព្រហស្បតិ៍ (ទី២១ ខែឧសភា ឆ្នាំ២០២៦) បានច្រានចោលការរិះគន់ពីចិន និងរុស្ស៊ីជុំវិញ​ «ការធ្វើយោធូបនីកម្ម​ឡើងវិញ» របស់ខ្លួន ដោយចាត់ទុក​ថា ជាការលើក​ឡើង​ «មិន​ឈរ​នៅលើ​មូលដ្ឋានការពិត​»។

ប្រធានាធិបតីចិន Xi Jinping និងសមភាគីរុស្ស៊ី​របស់លោក គឺលោក Vladimir Putin បានលើក​ឡើង​នៅក្នុងសេចក្តីថ្លែងការណ៍រួមមួយកាលពីថ្ងៃពុធថា ជប៉ុនកំពុងពន្លឿនការធ្វើយោធូបនីកម្ម​ឡើងវិញ និងគំរាមកំហែងដល់សន្តិភាព និងស្ថិរភាពក្នុងតំបន់។ លោក Putin បានបញ្ចប់ដំណើរទស្សនកិច្ចរយៈពេល ២ថ្ងៃនៅ​ប្រទេសចិន នា​ថ្ងៃពុធ។

បើយោងតាមទីភ្នាក់ងារសារព័ត៌មាន Kyodo បាន​ឲ្យ​ដឹង​ថា អនុរដ្ឋ​មន្ត្រី​ទទួល​បន្ទុក​ទីស្ដីការ​គណៈរដ្ឋមន្ត្រីជប៉ុន លោក Masanao Ozaki បាននិយាយ​នៅក្នុងសន្និសីទសារព័ត៌មានមួយថា ប្រទេស​ជប៉ុនចង់ឲ្យ​ចិន «ផ្លាស់ប្តូរឥរិយាបថរបស់ខ្លួន» ជុំវិញ​បញ្ហានានា​ ដូចជាសកម្មភាពយោធារបស់ទីក្រុងប៉េកាំងជាដើម​ និង​ជំរុញឲ្យ​រុស្ស៊ី «បញ្ឈប់ការឈ្លានពានរបស់ខ្លួនទៅលើអ៊ុយក្រែន»។.

គួរបញ្ជាក់ថា ទំនាក់ទំនងរបស់ជប៉ុនជាមួយចិន បានធ្លាក់ចុះយ៉ាងខ្លាំង ចាប់តាំងពីមាន​ការលើកឡើង​របស់នាយករដ្ឋមន្ត្រី លោកស្រី Sanae Takaichi កាលពីខែវិច្ឆិកាឆ្នាំមុន ដែល​ថា ការប្រើប្រាស់កម្លាំងដែលអាចកើតមានរបស់ចិន លើ​កោះ​តៃវ៉ាន់ ដែលទីក្រុង​ប៉េកាំង​ចាត់ទុកថា ជាខេត្តបំបែកខ្លួននោះ​ អាចបង្កើតជាស្ថានភាពគំរាមកំហែងដល់ការរស់រានមានជីវិត សម្រាប់ជប៉ុន ដែលប្រទេសនេះអាចអនុវត្តសិទ្ធិការពារខ្លួនរួមគ្នា៕