ក្រុមហ៊ុនផលិត​បន្ទះឈីបលំដាប់យក្ស​របស់​សហរដ្ឋ​អាមេរិក គឺ​ Nvidia បានរាយការណ៍ពីប្រាក់ចំណូលត្រីមាសទី១ ដែលមាន​កម្រិត​ខ្ពស់បំផុត កាលពីថ្ងៃពុធ (ទី២០ ខែឧសភា ឆ្នាំ២០២៦) ហើយបានចេញការ​ព្យាករដ៏រឹងមាំជាងការរំពឹងទុក ខណៈដែលតម្រូវការសម្រាប់ហេដ្ឋារចនាសម្ព័ន្ធបញ្ញាសិប្បនិម្មិត (AI) បានបន្តជំរុញកំណើន នៅក្នុងអាជីវកម្មមជ្ឈមណ្ឌលទិន្នន័យរបស់ខ្លួន។

ក្រុមហ៊ុនបានឲ្យ​ដឹង​ថា ប្រាក់ចំណូលសម្រាប់ត្រីមាសដែលបានបញ្ចប់នៅថ្ងៃទី២៦ ខែមេសា បានកើនឡើង ៨៥​ភាគរយ​ បើ​ធៀប​នឹងរយៈពេល​ដូច​គ្នានៅ​​ឆ្នាំមុន និងកើន​ឡើង​ ២០ភាគរយ​ ធៀប​នឹង​ត្រីមាសមុន ដោយ​ទឹក​ប្រាក់​ឡើង​ដល់ចំនួន​ ៨១,៦ពាន់លានដុល្លារ។

ប្រាក់ចំណូលពី​មជ្ឈមណ្ឌលទិន្នន័យ បានឈានដល់កម្រិត​ខ្ពស់​បំផុត​ ៧៥,២ពាន់លានដុល្លារ ដោយ​កើនឡើង ៩២ភាគរយ​ ធៀប​នឹង​ឆ្នាំ​មុន​ និងឡើង ២១ភាគរយ​ ធៀប​នឹង​ត្រីមាសកន្លង​មក​។ តាម​រយៈ​របាយការណ៍មុនរបស់ខ្លួន ក្រុម​ហ៊ុន​បាន​បង្ហាញ​ថា ប្រាក់ចំណូលពី​ដំណើរការ​មជ្ឈមណ្ឌលទិន្នន័យ បានឡើង​ដល់កម្រិត​ ៦០,៤ពាន់លានដុល្លារ ខណៈដែលប្រាក់ចំណូលបណ្តាញ បានកើនឡើងដល់ ១៤,៨ពាន់លានដុល្លារ។

ស្ថាបនិក និងជានាយកប្រតិបត្តិរបស់ក្រុម​ហ៊ុន​ Nvidia គឺ​លោក Jensen Huang បានលើក​ឡើង​នៅក្នុងសេចក្តីថ្លែងការណ៍ប្រាក់ចំណូលរបស់ក្រុមហ៊ុនថា៖ «ការសាងសង់រោងចក្រ AI ដែល​ជា​ការពង្រីកហេដ្ឋារចនាសម្ព័ន្ធធំបំផុត ក្នុងប្រវត្តិសាស្ត្រមនុស្សជាតិ កំពុងជួយ​ពន្លឿន​ក្នុងល្បឿនដ៏​លឿនអស្ចារ្យ​»។

លោក Huang បានបន្ថែម​ថា «ប្រព័ន្ធ​ Agentic AI បានចាប់​ផ្ដើម​កើត​ឡើង​ហើយ»​ ដោយលោក​បាន​បន្ថែមថា ក្រុម​ Nvidia កំពុង​ស្ថិត​នៅចំចំណុច​កណ្តាលនៃការផ្លាស់ប្តូរ ខណៈដែលវេទិការបស់ក្រុម​ហ៊ុន ដំណើរការ «នៅក្នុងគ្រប់ក្លោដ​ទាំងអស់»៕